Maharashtra Legislative Council Elections : राज्यात विधान परिषद निवडणुका जाहीर होताच महायुतीमध्ये जागावाटपाचा मोठा पेच निर्माण झालाय. कोकणात शिंदेसेना विरुद्ध दादांची राष्ट्रवादी,पुण्यात भाजप- शिंदेसेना आमनेसामने आल्याने अंतर्गत संघर्ष पेटण्याची चिन्हं आहेत. त्यामुळे विधानपरिषदेसाठी कुठे आणि कसा सामना रंगणार आहे? पाहूयात या स्पेशल रिपोर्टमधून...

केंद्रीय निवडणूक आयोगाने महाराष्ट्रातील स्थानिक स्वराज्य संस्थांच्या 17 विधान परिषद जागांची निवडणूक जाहीर करताच महायुतीमध्ये अंतर्गत जागावाटपावरून मोठा पेच निर्माण झालाय...कोकण आणि पुणे स्थानिक स्वराज्य संस्थेच्या दोन जागांवरून महायुतीतील मित्रपक्षांमध्ये उमेदवारीवरून उघड चढाओढ सुरू झालीय... त्यामुळे बदललेल्या राजकीय समीकरणांमुळे जागांवर नेमका हक्क कोणाचा यावरून रस्सीखेच होण्याची चिन्हं आहेत.

कोकणातील एका जागेवरून शिंदेसेना आणि दादांच्या राष्ट्रवादीत संघर्ष उफाळून आलाय... शिंदेसेनेकडून विकास गोगावले तर राष्ट्रवादीकडून सुनील तटकरेंचा मुलगा अनिकेत तटकरे विधानपरिषदेसाठी आग्रही आहे...

तर ठाणे आणि पालघरच्या एका जागेसाठी शिंदेसेना आणि भाजपमध्ये रस्सीखेच आहे... ठाणे-पालघर मतदारसंघात एकूण 1 हजार 30 नगरसेवक असून भाजपचे 444 तर शिंदेसेनेचे 326 नगरसेवक आहेत. त्यामुळे युतीत शिंदेसेना ही जागा भाजपला सहजासहजी सोडणार नाही, हे स्पष्ट आहे. त्यामुळे बहुजन विकास आघाडीची 71 मतं निर्णायक ठरणार आहेत...

दुसरीकडे पुण्यात भाजप आणि दादांच्या राष्ट्रवादीत संघर्ष पेटलाय... पुण्यात भाजपचे 306 तर राष्ट्रवादीचे 344 नगरसेवक निवडून आलेत.. त्यामुळे भाजपकडून गणेश बीडकर आणि राष्ट्रवादीकडून तीन जण इच्छुक आहेत...

दरम्यान कोकणातील जागेसाठी शिंदेसेनेच्या भरत गोगावलेंनी आपल्या मुलाच्या उमेदवारीसाठी उपमुख्यमंत्री एकनाथ शिंदेंची भेट घेतली. तर राष्ट्रवादीनं वेट अँड वॉचचा पवित्रा घेतला...

विधानपरिषद निवडणुकीत महायुतीतच सामना?

विधानपरिषदेच्या 17 जागांसाठी होणाऱ्या या निवडणुकीत महायुतीमधील अंतर्गत वाद चव्हाट्यावर य़ेण्याची शक्यता आहे. त्यामुळे कोणाला कोणती जागा मिळते हे पाहणं महत्त्वाचं ठरणार आहे...

ब्युरो रिपोर्ट, साम टिव्ही न्यूज