महेंद्र वानखेडे
वसई : प्लॅस्टिकच्या कॅरीबॅग वापरावर बंदी घालण्यात आली आहे. मात्र सर्रासपणे वापर केला जात असल्याचे पाहण्यास मिळते. विक्रेते देखील या कॅरीबॅगमध्ये ग्राहकांना वस्तू देत असतात. दरम्यान वसई- विरार महानगरपालिकेच्या आरोग्य विभागाकडून प्रतिबंधित प्लास्टिक पिशव्या बनविण्याच्या कारखान्यावर कारवाई करण्यात आली आहे, 

वसईच्या (Vasai) वाली परिसरातील गोलानी नाका येथे प्लास्टिक पिशव्या बनवण्याचा कारखाना सुरु आहे. या कारखान्याबाबतची माहिती सहाय्यक आयुक्त सुखदेव दरवेशी यांना मिळाली. यानंतर त्यांनी संबंधित ठिकाणी १५ दिवस पाळत ठेवून कारखान्यावर धाड टाकत कारवाई केली आहे, सदरच्या कारवाईत एकूण ५ हजार किलो प्रतिबंधित प्लास्टिकचा साठा (Plastic Ban) जप्त केला आहे. जप्त केलेल्या प्लास्टिकची किंमत बाजारभावात सात ते आठ लाख रुपये असून सदरच्या कारवाईमुळे प्लास्टिक पिशव्या उत्पादकांचे धाबे दणाणले आहेत. 

नागरिकांना आवाहन 

दरम्यान वसई परिसरात प्लास्टिक पिशव्या बनविणाऱ्या कारखान्यावर धाड टाकत कारवाई केली आहे. हि कारवाई मोठी असून अजून देखील अशा प्रकारचे कारखाने आपल्या आजूबाजूला प्रतिबंधित प्लास्टिकचे उत्पादन घेणाऱ्या कंपनी असल्यास त्याची माहिती पालिकेला द्यावी असे आवाहन करण्यात येत आहे.