तीन वेळा मुर्हूत हुकल्यानंतर आज अखेर वेभव खेडेकर यांचा भाजप प्रवेश झाला. भाजप अध्यक्ष रवींद्र चव्हाण यांच्या उपस्थितीत भाजपमध्ये प्रवेश झाला. काही दिवसांपासून खेडचे माजी नगराध्यक्ष वैभव खेडेकर यांचा भाजप प्रवेश रखडला होता.

महायुतीच्या संपर्कात असल्याने तसेच भाजपचे नेते मंत्री नितेश राणेसोबत बैठका घेतल्याने महाराष्ट्र नवनिर्माण सेनेने तळकोकणातील नेते वैभव खेडेकर यांच्यावर कारवाई केली होती. त्यानंतर खेडकर हे भाजपमध्ये जाणार असल्याची चर्चा सुरू झाली होती. खेडकर यांच्या भाजप प्रवेशावेळी कराडमधील चार नगरसेवकांनी मुंबईत प्रदेशाध्यक्ष रवींद्र चव्हाण यांच्या उपस्थितीत भाजपामध्ये प्रवेश केला आहे. यामध्ये यशवंत आघाडीच्या स्मिता हुलवान, स्वाभिमानी शेतकरी संघटनेतून विधानसभा निवडणुक लढलेले इंद्रजीत गुजर यांचा समावेश आहे.

दरम्यान मनसेनं हकालपट्टीची कारवाई केल्यानंतर त्यांनी आपली निर्णय जाहीर केला होता. मात्र तीनवेळा त्यांचा भाजपमध्ये प्रवेश होऊ शकलेला नसल्यानं त्यांच्यावर टीका केली जात होती. त्यानंतर शिवसेनेने त्यांना ऑफर दिली होती. भाजपनं जसे तीनदा केलं ते आम्ही करणार नाही असा टोला ही शिवसेनेने भाजपला मारला होता.

वैभव खेडेकर हे राज ठाकरेंचे निष्ठावंत नेते म्हणून ओळख. मनसेच्या स्थापनेपासून ते पक्षात कार्यरत होते. वैभव खेडकर यांनी २०१४ साली दापोली विधानसभा निवडणूक लढवली मात्र त्यांना पराभव पत्करावा लागला. दरम्यान खेड नगरपरिषदेत मनसेची सत्ता आणण्यात खेडेकर यांचा महत्त्वाचा वाटा होता. यापूर्वी ते खेडचे नगराध्यक्ष राहिले होते.