सांगली: सांगलीत राष्ट्रवादी महिला आघाडीच्या वतीने महागाईच्या विरोधात चूल पेटवून पंतप्रधान नरेंद्र मोदी यांना भेट म्हणून गोवऱ्या पाठवून अनोखे आंदोलन केले आहे. राष्ट्रवादी काँग्रेस सांगली महिला आघाडीच्या वतीने केंद्र सरकारने घरगुती गॅस सिलेंडरचे दर सहा महिन्यात दाम दुप्पट केल्याने या दरवाढीच्या निषेधार्थ हे आंदोलन केले आहे. (Unique agitation by sending cow dung to Prime Minister Narendra Modi)

राष्ट्रवादी काँग्रेस पक्ष कार्यालय जिल्हा परिषदे समोर चूल पेटवून महिलांनी निदर्शने करत परिसर दणाणून सोडला. सदरचे आंदोलन राष्ट्रवादी कांग्रेस पार्टी विधानसभा क्षेत्र महिला अध्यक्ष डॉक्टर छाया जाधव यांच्या नेतृत्वाखाली करण्यात आले. या आंदोलनात पंतप्रधान नरेंद्र मोदी यांना रजिस्टर पोस्टाने गोवऱ्या पाठविण्यात येणार आहे. दरवाढीच्या विरोधात सतत आंदोलने केली जात आहे, पण केंद्र सरकारने कोणतीही दखल घेतलेली नाही.

या दरवाढीमुळं सर्वसामान्य महिलांचं बजेट कोलमडलेले आहे. त्यांना आता गॅस ऐवजी शेणाच्या गोवऱ्यांवर स्वयंपाक करावा लागत असल्याने या गोवऱ्या देशाचे पंतप्रधान नरेंद्र मोदी यांना पाठवल्या असल्याचेही अध्यक्ष छाया जाधव यांनी सांगितले.

Edited By - Akshay Baisane