उल्हासनगर : अनेकदा गर्दीच्या ठिकाणी खिशात ठेवलेले मोबाईल चोरीला किंवा हरवत असतात. या बाबत दाखल तक्रारींवरून पोलिसांनी मोबाईलचा शोध घेत उल्हासनगरच्या हिललाईन पोलिसांनी चोरीला गेलेले आणि हरवलेले तब्बल ४ लाख २५ हजार रुपयांचे मोबाईल हस्तगत केले आहेत.

उल्हासनगर (Ulhasnagar) परिसरातून मागील काही दिवसात मोबाईल चोरी व हरवल्याच्या तक्रारी पोलिसात दाखल करण्यात आल्या होत्या. त्यानुसार उल्हासनगर हिललाईन पोलिसांकडून तपास सुरु होता. पोलिसांनी सीईआयआर पोर्टलच्या मदतीने विविध राज्यातून तपास करत ३० मोबाईल हस्तगत केले. यात विविध कंपनीचे मोबाईल (Mobile) आहेत. त्यांची साधारण किंमत सव्वाचार लाख आहे. हे मोबाईल ताब्यात घेत मूळ मालकांचा देखील तपास केला. 

पोलिसांकडून हस्तगत करण्यात आलेल्या मोबाईलच्या मूळ मालकांचा तपास करत खात्री पटल्यानंतर पोलिसांनी दसऱ्याच्या दिवशी मोबाईल हस्तांतरण कार्यक्रम आयोजित करून पुन्हा मूळ मालकांना परत केले. त्यामुळे नागरिकांमध्ये पोलिसांविषयी आदर वाढला आहे.