उल्हासनगर : उल्हासनगरात मंदिराबाहेर एका गोणीमध्ये स्त्री जातीचं अर्भक सापडल्याची घटना समोर आली आहे. स्थानिक नागरिकांच्या हा प्रकार लक्षात आल्यानंतर या अर्भकाला स्थानिकांनी शासकीय मध्यवर्ती रुग्णालयात दाखल केलं आहे. या अर्भकावर उपचार सुरु आहेत. 

उल्हासनगरच्या (Ulhasnagar) कॅम्प चार परिसरातील स्टेशनलगत असलेल्या अंबिका मंदिरात स्थानिक नागरिक पहाटेच्या सुमारास दर्शनासाठी येत असतात. नेहमीप्रमाणे काही नागरिक मंदिरात दर्शनासाठी आले असताना त्यांना पहाटे साडेपाच वाजताच्या सुमारास रडण्याचा आवाज आला. नागरिकांनी त्या दिशेने पहिले असता गोणीत काहीतरी पडल्याचे आढळून आले. त्यांनी गोणी उघडून पहिले असता त्यात हे अर्भक आढळून आले. 

त्यानंतर स्थानिक समाजसेवक राकेश माने आणि संदीप डोंगरे यांनी या अर्भकाला उल्हासनगरच्या शासकीय मध्यवर्ती रुग्णालयात दाखल केलं. तसेच याबाबतची माहिती पोलिसांना देण्यात आली. पोलिसांनी पाहणी करत तपस सुरु केला आहे. रुग्णालयात दाखल हे बाळ सुदृढ असून ते मंदिराबाहेर कोणी ठेवलं? याचा तपास आता पोलिसांकडून केला जातोय.