शिवसेनेच्या मुखपत्राला दिलेल्या मुलाखतीत उद्धव ठाकरेंनी पुन्हा एकदा मनसेसोबतच्या युतीबाबत नवा दावा केलाय. ठाकरे बंधूंच्या विजयी मेळाव्यानंतर उद्धव ठाकरेंनी पहिल्यांदा युतीबाबत स्पष्टीकरण दिलयं. युतीबाबत प्रॉब्लेम कुणाला आहेत, असा सवालच त्यांनी उपस्थित केलाय.

दरम्यान युतीसाठी राज ठाकरेंशी थेट चर्चा करणार असल्याचे संकेतही उद्धव ठाकरेंनी दिलेत. तसचं आम्ही चोरुनमारुन भेटणाऱ्यातले नाही असा टोलाही त्यांनी विरोधकांना लगावलाय...

उद्धव ठाकरेंच्या विधानामुळे ठाकरे बंधूंची राजकीय युती होण्याची जोरदार चर्चा सुरू आहे. त्यातच उद्धव ठाकरे हे वारंवार राज ठाकरे आणि आम्ही एकत्र आल्याचं सांगत आहेत. त्यामुळे मनसे आणि उबाठा महापालिका निवडणुका एकत्र लढवणार असल्याचे संकेत मिळतायत. मात्र दोन्ही नेते एकत्र आल्यावर महाविकास आघाडीचं काय होणार? असा सवाल उपस्थित केला जातोय. कारण राज ठाकरे महाविकास आघाडीसोबत येतील याची काहीच गॅरंटी नाहीये, त्यामुळे चर्चांना अधिकच उधाण आलंय. अशातच पहिल्यादा उद्धव ठाकरेंनी महाविकास आघाडीसोबतच्या युतीबाबतही भाष्य केलयं. तर काँग्रेस नेत्यांनीही स्थानिक परिस्थितीनुसार युतीचा निर्णय घेणार असल्याचं सांगितलयं.

दरम्यान उद्धव ठाकरे युतीसाठी सकारात्मक असले तरी राज ठाकरेंकडून युतीबाबत सावध पवित्रा घेण्यात आलाय. मिरारोडमधील सभेनंतर मराठीचा मुद्दा राज ठाकरे पालिका निवडणुकीत आक्रमकतेनं मांडणार हे निश्चित... त्यामुळे ठाकरे बंधू निवडणुकीपूर्वी युतीचा निर्णय घेतात का? ठाकरे बंधूंच्या युतीनं महाविकास आघाडीचं काय होणार? याकडे अनेकाचं लक्ष लागलयं.