नाशिक : नाशिकमधून एक मोठी बातमी समोर येते आहेत. नाशकात शिंदे गटाने शिवसेना उद्धव बाळासाहेब ठाकरे गटाला मोठा धक्का बसला आहे. ठाकरे गटातील डझनभर माजी नगरसेवक शिंदे गटाने आपल्या गळाला लावले आहेत. शुक्रवारी नाशिकमधील १२ माजी नगरसेवकांनी शिंदे गटात प्रवेश केला आहे. मुख्यमंत्री एकनाथ शिंदे यांच्या उपस्थितीत हा प्रवेश सोहळा पार पडला. (Latest Marathi News)

एकनाथ शिंदे  (Eknath Shinde) यांच्यासह ४० हून अधिक आमदारांनी बंड केल्यानंतर शिवसेनेला गळती सुरूच आहे. एकीकडे पक्षप्रमुख उद्धव ठाकरे आणि आदित्य ठाकरे हे नव्याने पक्षउभारणीची तयारी करत असताना, दुसरीकडे शिंदे गटात जोरदार इनकमिंग सुरू आहे. काही दिवसांपूर्वी ठाकरे गटातील खासदार संजय राऊत यांनी नाशिकचा दौरा केला होता.

शिवसेनेतून कुणीही बाहेर पडलेलं नाही, सगळे पदाधिकारी माझ्या भेटीसाठी आले आहेत. फक्त पालापाचोळा उडून गेला, असं राऊतांनी म्हटलं होतं. मात्र, संजय राऊत यांच्या नाशिक (Nashik) दौऱ्यानंतरही नाशिकमध्ये शिवसेनेला लागलेली गळती थांबलेली दिसत नाहीये.

कोणकोणते नगरसेवक शिंदे गटात ?

माजी नगरसेवक अजय बोरस्ते, सूर्यकांत लवटे, रमेश धोंगडे, डी. जी. सुर्यवंशी, सुदाम ढेमसे, श्यामकुमार साबळे, चंद्रकांत खाडे, सुवर्णा मटाले, पुनम मोगरे, जयश्री खर्जुळ, ज्योती खोले यांच्यासह अन्य माजी नगरसेवकांनी शिंदे गटात प्रवेश केला आहे.

आगामी महापालिका निवडणुकीच्या तोंडावर हा ठाकरे गटासाठी मोठा धक्का मानण्यात येत आहे. ठाकरे गटाने मुंबईसह नाशिक महापालिकेच्या निवडणुकीची तयारी सुरू केली आहे. याच पार्श्वभूमीवर काही दिवसांपूर्वी ठाकरे गटाचे नेते खासदार संजय राऊत यांचा नाशिक दौरा देखील झाला होता. मात्र आता नाशिकच्या ठाकरे गटाचे माजी नगरसेवकांनी शिंदे गटात प्रवेश केला आहे.

Edited By - Satish Daud