मुंबई ते नागपूर... अंतर दीड ते दोन तासांचं... पण या प्रवासात जे घडलं, त्यानं महाराष्ट्राच्या राजकारणात जोरदार चर्चांना उधाण आलंय. कारण सोबत होते राज्याचे दोन आजी-माजी मुख्यमंत्री. एकेकाळचे मित्र... आता विरोधक... उद्धव ठाकरे आणि देवेंद्र फडणवीस. मात्र हा फक्त विमानप्रवास नव्हता... तर महाराष्ट्राच्या राजकारणात नवे तर्क वितर्क लढवायला लावणारा प्रवास ठरला. कारण अवघ्या चार दिवसांपूर्वीच ठाकरेसेनेचे सहा खासदार शिंदेसेनेत गेले. खासदारांच्या या फुटीवर पुर्णपणे अलिप्त राहिलेल्या फडणवीसांसोबत ठाकरेंनी हवेत उच्चस्तरिय चर्चा केली. या विमान प्रवासानंतर उद्धव ठाकरेंनी जी राजकीय गुगली टाकली, त्यावर थेट एकनाथ शिंदेंनाही भाष्य करावं लागलं. यावरून आता राजकीय वर्तुळात गल्लीपासून दिल्लीपर्यंत तर्क-वितर्कांना ऊत आलाय.

शिंदेसेनेकडून हा निव्वळ योगायोग असल्याचं सांगितलं जात असलं... तरी राजकारणात योगायोगांपेक्षा संकेतांनाच जास्त महत्त्व असतं. ठाकरेसेनेचे सहा खासदार शिंदेंकडे गेल्यानंतर केंद्रात शिंदेंचं राजकीय वजन वाढलं. एनडीएमध्ये शिंदेसेना आता तिसऱ्या क्रमांकाचा मोठा पक्ष ठरलाय. त्यामुळे भाजपमध्येही अंतर्गत राजकीय समीकरणं बदलत असल्याची चर्चा सुरू झाली. नुकत्याच झालेल्या या खासदारांच्या फुटीनं राज्यात शिंदेंना अधिक बळ दिलं जात असल्याची कुजबूज दबक्या आवाजात सुरु झाली. मात्र खासदार संजय राऊतांनी यावर जाहीरपणे भाष्य केल्यानं याची खुली चर्चा होऊ लागलीय

तृणमूलचे खासदार फुटले... पण ते थेट भाजपात न जात एका अशा पक्षात गेले ज्याची ओळख कुणालाच नव्हती. 15 दिवसांतच ठाकरेंचे सहा खासदारही भाजपमध्ये न जाता शिंदेसेनेत गेले. त्यामुळे केंद्रात घडणाऱ्या राजकीय हालचालींकडे एक मोठा राजकीय गेमप्लॅन म्हणून पाहिलं जातंय. त्यातच ऑपरेशन टायगरचा देवेंद्र फडणवीसांना जास्त धोका असल्याचा इशारा संजय राऊतांनी दिला. त्यामुळे शिंदे-शहा विरुद्ध फडणवीस... असं राजकीय चित्र उभं राहतंय का, हा प्रश्न उपस्थित होतोय. त्यामुळेच उद्धव ठाकरेंसोबतचा फडणवीसांचा हा विमानप्रवास... फक्त योगायोग होता... की शिंदेसेनेला संकेत देण्यासाठी जुन्या मित्राशी साधलेला राजकीय संवाद? या प्रश्नांचं उत्तर येणारा काळात समोर येईल.