अभिजीत देशमुख

Kalyan Fire News : कल्याणमध्ये दिवसभरात आगीच्या दोन घटना घडल्या आहेत. या लागलेल्या आगीत मोठं नुकसान झालं आहे . या दोन्ही घटनेत जिवीत हानी झालेली नसली तर मोठी वित्तहानी झाली. एका घटनेत घर जळून खाक झाले तर दुसऱ्या घटनेत लाखोंच्या वायरी जळून खाक झाल्या आहेत. या घटनेने परिसरात एकच खळबळ उडाली होती. या दोन्ही आगीवर नियंत्रण मिळविण्यात आलं आहे. (Latest Marathi News)

कल्याण (Kalyan) पूर्वेतील तीसगावमधील अक्षय गायकवाड यांच्या घराला सव्वा सहा वाजनाच्या सुमारास आग (Fire) लागली. या घराच्या आजूबाजूला दाट लोकवस्ती असल्याने परिसरात घबराट पसरली होती. काही क्षणात आगीने रौद्ररूप धारण केल्याने या आगीत गायकवाड यांचे घर व घरातील सामान जळून खाक झाले आहे.

आगीची माहिती मिळताच अग्निशमन दलाने घटनास्थळी धाव घेत तासाभरात आगीवर नियंत्रण मिळवलं. आग लागली तेव्हा गायकवाड कुटुंबिय घराबाहेर होते. त्यामुळे याठिकाणीही जीवित हानी टळली आहे.

दरम्यान, शॉर्ट सर्किटमुळे आग लागल्याचा प्राथमिक अंदाज व्यक्त करण्यात आला आहे. तर याच दरम्यान लोकग्राम परिसरातील गवताला सायंकाळच्या सुमारास आग लागली. या गवता शेजारी जीओचा मोबाईल टॉवर आहे. त्याठिकाणी जीओ कंपनीची केबल होती.

आगीत ही केबल जळून खाक झाली आहे. या घटनेत जिवीतहानी झालेली नाही. ही आग समाजकटंकांनी लावली असल्याचा प्राथमिक अंदाज व्यक्त करण्यात येत आहे.