भंडारा : जंगलात मोहफूल वेचण्यासाठी गेल्यानंतर कालव्यात उतरून हातपाय धुणे काका पुतण्याच्या जीवावर बेतल्याची घटना भंडारा (bhandara) जिल्ह्यात घडली आहे. तुमसर तालुक्यातील आसलपानी येथील कारली लघुकालव्यात दोघांचा बुडून मृत्यू झाला. साहील राजेश कोकोडे (वय १२) आणि हौसीलाल हिरदेराम कोकोडे (वय २४) दोघेही (रा. आसलपानी ता. तुमसर) अशी मृतांची नावे आहेत. (bhandara latest marathi news)

या घटनेबाबत मिळालेली माहिती अशी : साहील व हौसीलाल जंगलात (jungle) मोहफूल वेचण्यासाठी गेले होते. घराकडे परतताना वाढत्या तापमानामुळे दाेघेही घामाने भिजले हाेते. हातपाय धुण्यासाठी दोघेही कारली लघुकालव्यात उतरले. त्यावेळी त्यांचा तोल गेल्याने दोघेही पाण्यात पडले.

तेथे वाचवण्यासाठी त्यांनी हाका मारल्या मात्र कुणीही नसल्याने दोघांचाही पाण्यात बुडून मृत्यू झाला. या घटनेची माहिती मिळताच गावकऱ्यांनी (villagers) घटनास्थळी धाव घेतली. त्यानंतर पोलिसांना पाचारण करण्यात आले.

साहील हा येरली येथील आश्रमशाळेत इयत्ता सातवीत शिकत होता. तो आश्रमशाळेत जाणार होता. त्यापूर्वीच ही दुर्दैवी घटना घडल्याने या घटनेने आसलपानी गावावर शोककळा पसरली आहे.

Edited By : Siddharth Latkar