Hotel Bhagyashree News Update : धाराशिव जिल्ह्यातील तुळजापूर येथील प्रसिद्ध हॉटेल भाग्यश्रीच्या मालकाला मारहाण आणि अपहरणाच्या प्रकरणात पोलिसांनी मोठी कारवाई केली आहे. या प्रकरणात पाच आरोपींना अटक करण्यात आली आहे. धाराशिव शहर पोलिसांनी जामखेड येथून पाच आरोपींना ताब्यात घेतले. यापैकी चार आरोपींना अटक झाली आहे, तर एका आरोपीवर वैद्यकीय कारणास्तव शासकीय रुग्णालयात उपचार सुरू आहेत. हॉटेल भाग्यश्रीच्या मालकाला मारहाण झाल्याची घटना 23 जुलै 2025 रोजी घडली होती. त्यानंतर तुळजापूर आणि संपूर्ण परिसरात खळबळ उडाली होती. (Hotel Bhagyashree owner kidnapped and assaulted in Tuljapur)

आरोपींनी हॉटेल भाग्यश्रीच्या मालकाचे अपहरण करून बंदुकीचा धाक दाखवत जीव घेण्याचा प्रयत्न केल्याचा गंभीर आरोप आहे. याप्रकरणी गुन्हा दाखल झाला होता, परंतु सुरुवातीला आरोपी अटकेत न आल्याने हॉटेल मालकाने आंदोलनाचा इशारा दिला होता. यानंतर राजकीय स्तरावरून दबाव वाढला. विशेषतः आ. रोहित पवार यांच्यासह इतर नेत्यांनी हस्तक्षेप केल्याने पोलिसांनी तातडीने कारवाई करत आरोपींना जामखेड येथून अटक केली. विशेष म्हणजे, जामखेड हा आमदार रोहित पवार यांचा मतदारसंघ आहे, ज्यामुळे या कारवाईला राजकीय रंग प्राप्त झाला आहे.

सोशल मीडियावर या प्रकरणाने मोठी चर्चा घडवली होती. हॉटेल भाग्यश्रीच्या मालकाला मारहाण आणि अपहरणाच्या घटनेने स्थानिक नागरिकांमध्ये संतापाची लाट पसरली होती. पोलिसांनी या प्रकरणाचा तपास तीव्र केला आहे. धाराशिव शहर पोलीस या प्रकरणात आणखी काही पुरावे आणि माहिती गोळा करत आहेत. या कारवाईमुळे स्थानिकांमध्ये काहीसा दिलासा मिळाला असला, तरी या प्रकरणाचा पूर्ण खुलासा होण्याची प्रतीक्षा आहे.