मराठा समाजाच्या आरक्षणाच्या मागणीसाठी मनोज जरांगे पाटील यांच्या नेतृत्वाखाली येत्या २९ ऑगस्टपासून मुंबईतील आझाद मैदानावर आंदोलन होणार आहे. या आंदोलनाच्या पार्श्वभूमीवर राज्यभरातून समाजबांधव मोठ्या संख्येने मुंबईकडे कूच करणार असल्याने विविध जिल्ह्यांमध्ये वाहतूक व्यवस्था बदलण्यात येत आहे. छत्रपती संभाजीनगर जिल्ह्यातून मोठ्या प्रमाणावर मोर्चेकरी मुंबईकडे रवाना होणार असल्याने बीड-पुणे महामार्गावर होणारी संभाव्य वाहतूक कोंडी टाळण्यासाठी प्रशासनाकडून वाहतूक वळविण्याचे आदेश जारी करण्यात आले आहेत.

मिळालेल्या माहितीनुसार, अंतरवाली सराटी येथून निघणारा हा मोर्चा शहागड, तुळजापूर, पैठण आणि शेवगावमार्गे २९ ऑगस्ट रोजी मुंबईत पोहोचेल. या मोर्चामध्ये नांदेड, हिंगोली, परभणी, लातूर, धाराशिव, बीड या जिल्ह्यांसह इतर भागातून हजारोंच्या संख्येने समाजबांधव सहभागी होणार आहेत. चारचाकी, दुचाकी, ट्रॅक्टर आणि इतर वाहनांच्या मोठ्या ताफ्यातून हे मोर्चेकरी मुंबईकडे निघणार असल्याने महामार्गावर प्रचंड गर्दी होण्याची शक्यता वर्तविण्यात येत आहे.

यामुळे बुधवारी रात्री १२ वाजल्यापासून गुरुवारी सकाळी ६ वाजेपर्यंत काही मार्गावरील वाहतूक पूर्णपणे बंद ठेवण्याचे आदेश पोलिस अधीक्षक डॉ. विनयकुमार राठोड यांनी दिले आहेत. या दरम्यान पर्यायी मार्गांची व्यवस्था करण्यात आली आहे. छत्रपती संभाजीनगर, बिडकीन, पैठणमार्गे शेवगावकडे जाणारी वाहने वाळूज, गंगापूर, नेवासा मार्गे वळविण्यात येणार आहेत. तर शहागड, हिरडपुरी, तुळजापूर, नवगाव मार्गे पैठणकडे जाणारी वाहने शहागड, डोणगाव, पाचोडमार्गे नेण्यात येतील. पैठण, नवगाव, हिरडपुरीमार्गे शहागडकडे जाणारी वाहने पाचोड, डोनगावमार्गे शहागडकडे वळविण्यात येणार आहेत.

या बदललेल्या मार्गांमुळे वाहनधारकांनी काळजीपूर्वक नियोजन करून प्रवास करावा, असे आवाहन प्रशासनाकडून करण्यात आले आहे. आंदोलनाच्या काळात रस्त्यांवर प्रचंड गर्दी होण्याची शक्यता असल्याने पोलीस दल, वाहतूक विभाग आणि स्थानिक प्रशासन सतर्क आहे.

दरम्यान, जरांगे पाटील यांच्या आंदोलनाकडे राज्यातील सर्वसामान्यांचे लक्ष लागले असून, हे आंदोलन किती तीव्रतेने पार पडते आणि सरकारकडून याबाबत कोणता निर्णय घेतला जातो, याकडे आता सर्वांचे लक्ष लागले आहे. या आंदोलनामुळे मुंबईसह संपूर्ण राज्यात कायदा व सुव्यवस्था टिकविण्यासाठी पोलिस प्रशासन सतर्क राहणार आहे.