उत्तरेकडील शीत लहरींचे पुन्हा महाराष्ट्रात आगमन झाल्याने राज्यात गारठा वाढला आहे. धुळे येथील कृषी महाविद्यालयात पारा ५.४ अंशांवर आल्याने हंगामातील नीचांकी तापमान नोंदले गेले आहे. आज विदर्भासह राज्यात तुरळक ठिकाणी थंडीच्या लाटेची शक्यता आहे. तर उद्यापासून मध्य महाराष्ट्र, मराठवाड्यात थंडीच्या तीव्र लाटेचा इशारा हवामान विभागाने दिला आहे. दरम्यान बदलत्या हवामानामुळे नागरिक त्रस्त झाले आहेत.

महाराष्ट्रात हळूहळू पुन्हा गारठा वाढू लागला आहे. नागरिकांनी थंडी पासून बचाव करण्यासाठी शेकोट्या पेटवलेल्या पाहायला मिळत आहेत. विदर्भासह, उत्तर महाराष्ट्रात किमान तापमान घटल्याने थंडीचा कडाका वाढला आहे. पहाटे धुक्याची चादर पसरत असून, हुडहुडी वाढत आहे. धुळे येथील कृषी महाविद्यालयात राज्याचे यंदाच्या हंगामातील नीचांकी ५.४ अंश सेल्सिअस तापमानाची नोंद झाली.

नाशिकच्या ग्रामीण भागात तापमानाचा पारा घसरला आहे. तसेच मालेगावचे तापमान अकरा अंशावर असताना पारा आणखी खाली घसरला असून तो ९ अंशावर आल्याने नागरीकांना चांगलीच हुडहुडी भरली आहे. शिवाय यंदाच्या हंगामातील यवतमाळ जिल्ह्याचा सर्वाधिक कमी तापमानाची नोंद करण्यात आली असून पारा ८.८ अंशावर स्थिरावला. तर दुसरीकडे दिवसाचे तापमान वाढत असल्याचेही विरोधाभासी चित्र निर्माण झाली आहे. जळगाव, अहिल्यानगर, अमरावती, ‎नागपूर, मालेगाव, ‎छत्रपती संभाजीनगर या जिल्ह्यांचा देखील तापमानाचा पारा घसरला असून हुडहुडी वाढली आहे.

किमान तापमानाचा पारा १० अंशांच्या खाली आल्यास तसेच तापमानात सरासरीच्या तुलनेत ४.५ अंशांची घट झाल्यास थंडीची लाट आल्याचे समजले जाते. रविवारी धुळे, निफाड, परभणी, अमरावती, यवतमाळ येथे थंडीची लाट होती. आज राज्यातील पूर्व विदर्भातील वर्धा, नागपूर आणि गोंदिया येथे थंडीची लाट येण्याची शक्यता असल्याने हवामान विभागाने येलो अलर्ट जाहीर केला आहे. उद्यापासून मध्य महाराष्ट्र, मराठवाड्यात थंडीच्या तीव्र लाटेचा इशारा हवामान विभागाने दिला आहे. दरम्यान या बदलत्या हवामानाने नागरिक त्रस्तावले आहेत.