ओंकार कदम, सातारा प्रतिनिधी

Satara Accident Death News : हॉटेलमध्ये जेवण करून हॉस्टेलकडे परतत जाताना झालेल्या अपघातात ३ कर्मचाऱ्यांचा मृत्यू झाला आहे. भरधाव कारवरील नियंत्रण सुटल्याने झालेल्या भीषण अपघातात तीन तरुणांचा जागीच मृत्यू झाला, तर अन्य तिघे गंभीर जखमी झाले आहेत. हा अपघात फलटण तालुक्यातील वाठारनिंबाळकर हद्दीत झाल. याप्रकरणी फलटण ग्रामीण पोलीस ठाण्यात गुन्हा दाखल करण्यात आला आहे.

मिळालेल्या माहितीनुसार, सर्व तरुण हॉटेलमध्ये जेवण उरकून कारने (स्विफ्ट डिझायर) हॉस्टेलकडे परतत होते. वाठारनिंबाळकर हद्दीत आले असता, चालक मोहम्मद हुसेन याचे भरधाव कारवरील नियंत्रण सुटले. त्यामुळे गाडी रस्त्याच्या कडेला असलेल्या नालीच्या कठड्याला जोरदार धडकून पलटी झाली. ही धडक इतकी भीषण होती की गाडीचा चक्काचूर झाला.

या अपघातात चालक मोहम्मद हुसेन (वय - मूळ रा. अयोध्या, उत्तर प्रदेश), अनिल हेबरम आणि सदानंद पुर्ती (दोघे रा. जमशेदपूर, झारखंड) यांचा जागीच दुर्दैवी मृत्यू झाला. तर नयन लोंगाणी, सौरभ कुमार आणि एम.डी. मितारे हे तीन तरुण गंभीर जखमी झाले आहेत.

घटना घडताच स्थानिक नागरिकांनी व पोलिसांनी तत्काळ घटनास्थळी धाव घेऊन जखमींना बाहेर काढले. जखमींवर सध्या फलटण आणि बारामती येथील रुग्णालयात उपचार सुरू आहेत. या अपघातामुळे परिसरात हळहळ व्यक्त केली जात असून, फलटण ग्रामीण पोलीस पुढील तपास करत आहेत.