मुंबई महानगर पालिका निवडणुकीचे निकाल आता हाती आले आहेत. तब्बल २५ वर्षांनंतर मुंबई महापालिकेचा महापौर भाजपचा असणार आहे. मुंबई महापालिकेच्या निवडणूकीत महायुतीला मिळालेल्या दणदणीत विजयामुळे राज्याचे मुख्यमंत्री देवेंद्र फडणवीस खूश असून त्यांनी ट्विट करून पहिली प्रतिक्रिया दिली आहे.

देवेंद्र फडणवीसांनी त्यांच्या एक्स अकाऊंटवरून ट्विट केलंय. यामध्ये ते म्हणालेत, भाजपने पुन्हा एकदा इतिहास रचलाय, महानगरपालिका निवडणूक २०२५-२६! माननीय पंतप्रधान नरेंद्र मोदीजी यांच्या नेतृत्वाखाली, भाजपचे राष्ट्रीय अध्यक्ष आणि माननीय केंद्रीय मंत्री जे. पी. नड्डाजी, माननीय केंद्रीय गृहमंत्री व सहकारमंत्री अमितभाई शहा, भाजपचे राष्ट्रीय कार्यकारी अध्यक्ष नितीन नबिनजी तसंच राज्याध्यक्ष आमदार रवींद्र चव्हाण आणि सर्व कार्यकर्त्यांच्या अथक परिश्रमामुळे भाजपने राज्यात पुन्हा एकदा भव्य विजय मिळवला आहे!

हा विजय म्हणजे प्रगती आणि विकासाची हमी देणाऱ्या भाजपच्या दृष्टिकोनावर लोकांचा असलेला विश्वास आहे, असंही देवेंद्र फडणवीसांनी म्हटलंय.

अमित साटम यांचं केलं अभिनंदन

दरम्यान बीएमसी निवडणुकीत महायुतीच्या विजयानंतर मुख्यमंत्री फडणवीस यांनी मुंबई भाजप अध्यक्ष अमित साटम यांना फोन केला. यावेळी फोनवर बोलताना फडणवीस म्हणाले, "अभिनंदन अमित. कशाचीही काळजी करण्याची गरज नाही. तुम्ही खूप छान काम केलं आहे. ते जबरदस्त आहे."