राजेश भोस्तेकर, रायगड

रायगड: देवाची दारं आजपासून भाविकांसाठी खुली झाली आहेत. रायगड जिल्ह्याच्या पालकमंत्री अदिती तटकरे यांनी पाली बल्लाळेश्वरचे दर्शन घेतले. जिल्ह्यात देव दर्शनासाठी मोठ्या प्रमाणात भाविकांची पावले मंदिराकडे वळली आहेत. (Temples opened! Guardian Minister Aditi Tatkare visited Pali Ballaleshwar)

हे देखील पहा -

कोरोनाच्या पार्श्वभूमीवर मंदिरे, प्रार्थना स्थळे बंद करण्यात आली होती. त्यामुळे दीड वर्षांपासून देवाचे दर्शन भाविकांना घेता आले नव्हते. कोरोना प्रादुर्भाव कमी होऊ लागल्याने शासनाने राज्यातील मंदिरे भाविकांसाठी दर्शनासाठी आज घटस्थापनेच्या मुहूर्तावर ७ ऑक्टोबर पासून खुली केली आहेत. अष्टविनायकपैकी एक असलेले पाली बल्लाळेश्वर मंदिरही आज दर्शनासाठी खुले करण्यात आले आहे. रायगडच्या पालकमंत्री अदिती तटकरे यांनी सकाळी नऊ वाजता मंदिरात जाऊन बल्लाळेश्वराचे दर्शन घेतले. राज्यावर आलेल्या कोरोना संकटाचे लवकरात लवकर अरिष्ट दूर होऊ दे अशी प्रार्थना अदिती तटकरे यांनी बल्लाळेश्वर चरणी केली आहे. कोरोनाच्या नियमाचे पालन करून भाविकांनी दर्शन घ्यावे असे आवाहनही पालकमंत्री यांनी केले आहे. पाली बल्लाळेश्वर देवस्थान प्रशासनाने कोरोनाच्या अनुषंगाने भाविकांच्या आरोग्याच्या दृष्टीने खबरदारी घेतली आहे.

राज्यात कोरोना रुग्णसंख्या आटोक्यात असल्याने हळूहळू सर्व गोष्टी पुर्वपदावर येत आहेत. राज्यातील शाळा ४ ऑक्टोबर पासून सुरु झाल्या होत्या. आज ७ ऑक्टोबरपासून धार्मिक स्थळं खुली होत आहेत. तसेच २२ ऑक्टोबरपासून सिनेमागृहेसुद्धा खुली करण्यात येणार आहे. मात्र या सगळ्या ठिकाणी कोरोनोचे नियम पाळणे, मास्क वापरणे, फिजीकल डिस्टन्स ठेवणे हे बंधनकारक आहे.

Edited By - Akshay Baisane