भारत नागणे, पंढरपूर

Pandharpur News : खासगी विनाअनुदानित शाळेत एकही दिवस न आलेल्या शिक्षकाचे साडेतीन लाख रुपयांचे वेतन बनावट स्वाक्षऱ्या करून मुख्याध्यापकानेच हडपल्याचा धक्कादायक प्रकार समोर आला आहे.

या प्रकरणी माढा तालुक्यातील आलेगाव (खु) येथील सरस्वती माध्यमिक विद्यालयाचे मुख्याध्यापक बाळासाहेब केचे याच्यावर टेंभुर्णी पोलिसांत गुन्हा दाखल करण्यात आला आहे. (Maharashtra News)

माध्यमिक शिक्षणाधिकाऱ्यांच्या २५ मार्च २०२१ रोजीच्या आदेशानुसार नोव्हेंबर २०२० पासून सरस्वती विद्यालयाच्या पाचवी ते सातवीपर्यंतच्या वर्गाला २० टक्के अनुदान मिळाले. त्यानंतर सागर नवगण यांच्या खोट्या स्वाक्षऱ्या करून हजेरीपत्रक बनवून वेतनदेयक तयार करण्यात आले.

नोव्हेंबर २०२० ते डिसेंबर २०२२ या काळातील तीन लाख ५८ हजार ६२३ रुपयांचे वेतन शालार्थ प्रणालीद्वारे काढले. नवगण यांचे जिल्हा बँकेच्या भीमानगर शाखेत खाते नसल्याने त्यांचे वेतन शाळेच्या खात्यात जमा झाले. त्या खात्यातून साडेसात लाख रुपये काढून दादासाहेब केचे पतसंस्थेत वर्ग केले.

जिजामाता शिक्षण प्रसारक मंडळाच्या सरस्वती माध्यमिक विद्यालयाचे मुख्याध्यापक बाळासाहेब केचे यांनी सागर नवगण यांच्या शैक्षणिक व व्यावसायिक कागदपत्रांचा गैरवापर केल्याचे प्रथमदर्शनी स्पष्ट झाले.

त्यामुळे संबंधित मुख्याध्यापकावर सरकारची फसवणूक करून रकमेचा अपहार केल्याप्रकरणी फौजदारी गुन्हा दाखल करण्यात आला आहे.