संदीप नागरे/साम टीव्ही न्यूज

आता बातमी समोर आली आहे. साम टीव्हीच्या इम्पॅक्टची, गुन्हेगारी वृत्तीच्या लोकांसोबत सोशल मीडियामध्ये व्हिडिओ प्रसारित होणे एका पोलीस अधिकार्‍याच्या चांगलेच अंगलट आले आहे. साम टीव्हीच्या बातमीनंतर हिंगोली पोलीस दलातील पोलीस उपनिरीक्षक पद्माकर खंदारे यांचं पोलीस अधीक्षकांनी निलंबन केल आहे.

निलंबित पोलीस उपनिरीक्षक पद्माकर खंदारे हे सेनगाव पोलीस स्थानकात कर्तव्यावर होते. यावेळी त्यांचे वाळू माफिया आणि गुंड प्रवृत्तीच्या असलेल्या एका तरुणांसोबत व्हिडिओ व्हायरल झाले होते. भाऊ राठोड असे या सोशल मीडियावर रिल्स बनवत असलेल्या तरुणाचे नाव असून हा भाऊ राठोड कधी टेबलवर नोटांचे बंडल तर कधी नदीमध्ये अवैध वाळू उपसा करताना व्हिडिओ बनवत होता. या व्हिडिओमध्ये टिप्पर बोट यासह जेसीबी देखील दिसत होती.

भाऊ राठोडच्या याच व्हिडिओमुळे समाजात दहशत देखील निर्माण झाल्याचा आरोप सेनगाव शहरातील नागरिकांनी पोलीस अधीक्षक श्रीकृष्ण कोकाटे यांच्याकडे निवेदनाद्वारे केला होता. या सगळ्या प्रकरणानंतर स्थानिक गुन्हे शाखेच्या पोलिस अधिकाऱ्यांनी रिल्स बनवणाऱ्या भाऊ राठोडला ताब्यात घेत समाचार घेतला त्यानंतर या भाऊ राठोडने सोशल मीडिया यापुढे आपण कोणताही व्हिडिओ प्रसारित करणार नाही असे म्हणत माफी देखील मागितली होती.

मात्र साम टीव्हीच्या बातमीनंतर आरोपीसोबत व्हिडिओमध्ये दिसणाऱ्या पोलीस अधिकाऱ्यांवर तातडीने कार्यवाही करा अशी मागणी विधिमंडळात भाजप आमदार परीनय फुके यांनी केल्यानंतर आता मात्र पोलीस अधीक्षकांनी पोलीस उपनिरीक्षकांचे निलंबन केले आहे. या सगळ्या प्रकरणात मात्र व्हिडिओत आरोपी सोबत दिसणे पोलीस अधिकाऱ्यांना चांगलेच महागात पडले आहे.