जीवन पाटील

सांगली : पुणे जिल्ह्यातील देहूरोड येथील शेतकऱ्याकडे (Bribe Crime) एक कोटी रुपयांची लाच मागणाऱ्या निलंबित पोलीस कॉन्स्टेबलला कुपवाड एमआयडीसी पोलिसांनी अटक केलीय. जॉन तिवडे असं (culprit arrested) अटक केलेल्या आरोपीचं नाव आहे. २०२० मध्ये नातेवाईक असलेल्या एका अल्पवयीन मुलीच्या अपहरण आणि अत्याचार प्रकरणात आरोपी तिवडे विरोधात कुपवाड पोलीस स्टेशमध्ये गुन्हा दाखल करण्यात आला होता. त्यानंतर सदर आरोपी दोन वर्षांपासून फरार होता. पंरतु, पोलिसांनी (Police) या प्रकरणाचा छडा लावला असून आरोपी जॉन तिवडेला अटक केली आहे. तिवडेला न्यायालयाने तीन दिवसांची पोलीस कोठडी ठोठावली आहे.

काय घडलं होतं ?

आरोपी जॉन तिवडेने देहूरोड येथील शेतकऱ्याकडे एक कोटी रुपयांची लाच मागितली होती. महसूल न्यायाधिकरणमध्ये दाखल खटल्यांचा निकाल शेतकऱ्याच्या बाजूने लावून देण्याचं आमिष तिवडेनं दाखवलं होतं. त्यानंतर तिवडे विरोधात कोल्हापूर जिल्ह्यातील शाहूपुरी पोलीस ठाण्यात गुन्हा दाखल झाला. मात्र, आरोपी तिवडे फरार झाला होता.

तसेच त्याच्या विरोधात कुपवाड पोलीस ठाण्यात २०२० मध्ये अल्पवयीन मुलीचे अपहरण आणि अत्याचार केल्याप्रकरणी गुन्हा दाखल होता. कुपवाड पोलिसांच पथक जॉन तिवडेचा शोध घेत होते. मात्र, तो पोलिसांना नेहमी चकवा देत फरार व्हायचा. दरम्यान, आज सकाळी तिवडे मिरजेत आल्याची खबर मिळताच पोलिसांनी सापळा रचून त्याला अटक केली, अशी माहिती कुपवाड एमआयडीसी पोलीस ठाण्याचे पोलीस निरिक्षक अविनाश पाटील यांनी दिली आहे.

Edited By - Naresh Shende