दहावी आणि बारावीच्या विद्यार्थ्यांसाठी महत्वाची बातमी आहे. दहावी आणि बारावीच्या पुरवणी परीक्षेची तारीख जाहीर करण्यात आली आहे. दहावी आणि बारावीची पुरवणी परीक्षा १६ जुलैपासून सुरू होणार आहे. राज्य शिक्षण मंडळाने ही महत्वाची माहिती दिली आहे. परीक्षांसाठीचे प्रवेशपत्र गुरूवारी ४ जुलैपासून उपलब्ध करून देण्यात येणार आहे.

मिळालेल्या माहितीनुसार, बारावीच्या पुरवणी परीक्षेचे आयोजन १६ जुलै ते ८ ऑगस्ट दरम्यान करण्यात आले आहे. दहावीच्या पुरवणी परीक्षेचे आयोजन १६ जुलै ते ३० जुलै या दरम्यान करण्यात आले आहे. कोणतेही शुल्क न घेता दहावी आणि बारावीच्या पुरवणी परीक्षेसाठी प्रवेशपत्राची मुद्रित प्रत विद्यार्थ्यांना देण्याची सूचना राज्य मंडळाचे प्रभारी सचिव शैलेंद्र पाटील यांनी केली आहे.

महत्वाचे म्हणजे, जुलै-ऑगस्ट या महिन्यांदरम्यान होणाऱ्या दहावी-बारावीच्या पुरवणी परीक्षेची प्रवेशपत्रे सर्व विभागीय मंडळाच्या कार्यकक्षेतील सर्व माध्यमिक व उच्च माध्यमिक शाळा, कनिष्ठ महाविद्यालयांनी मुद्रित करून विद्यार्थ्यांना द्यायची आहेत. प्रवेशपत्राची मुद्रित प्रत देण्यासाठी कोणतीही वेगळी फी घेतली जाणार नाही. त्यामुळे कोणतेही शुल्क न घेता विद्यार्थ्यांना प्रवेशपत्रे देण्याच्या सूचना देण्यात आल्या आहेत.