विश्वभूषण लिमये, सोलापूर

Solapur Aarav Chaudhary Dies News बार्शी शहरातील शिवशक्ती मैदानावर आयोजित करण्यात आलेल्या क्रिकेट समर कॅम्पमध्ये शनिवारी सकाळी अत्यंत दुर्दैवी घटना घडली. क्रिकेट पिच तयार करण्यासाठी वापरण्यात येणारा जड रोलर अंगावरून गेल्याने आरव ऊर्फ वीरेन योगीराज चौधरी (वय १५) या नववीत शिकणाऱ्या विद्यार्थ्याचा मृत्यू झाला. या घटनेमुळे विद्यार्थ्याच्या कुटुंबियांवर दुःखाचा डोंगर कोसळला आहे.

मिळालेल्या माहितीनुसार, शिवशक्ती मैदानावर बार्शी (Shivshakti Playground Barshi Solapur) तालुका क्रिकेट असोसिएशनच्या वतीने क्रिकेट समर कॅम्पचे (Cricket Summer Camp) आयोजन करण्यात आले होते. आरवने या कॅम्पमध्ये प्रवेश घेतला होता. शनिवारी सकाळी तो नेहमीप्रमाणे सरावासाठी मैदानावर गेला होता. कॅम्पमध्ये विवेक दुगम आणि अक्षय देबडवार हे प्रशिक्षक मुलांना प्रशिक्षण देत होते. मृत विद्यार्थ्याचे वडील योगीराज चौधरी यांनी दिलेल्या फिर्यादीनुसार, सकाळी सुमारे ७ ते ७.३० वाजण्याच्या दरम्यान १२ ते १५ वर्षे वयोगटातील मुलांकडून क्रिकेट पिचवरील जड रोलर ओढून घेतला जात होता.

हा रोलर हलवताना घटनास्थळी कोणताही तंत्रज्ञ, प्रशिक्षक किंवा जबाबदार व्यक्ती उपस्थित नव्हती. प्रशिक्षक काही अंतरावर उभे होते, असेही फिर्यादीत नमूद करण्यात आले आहे. रोलर ओढत असताना आरवचा अचानक तोल गेला आणि तो खाली पडला. त्याच वेळी जड रोलर त्याच्या पायापासून छातीपर्यंत अंगावरून गेल्याने गंभीर दुखापत झाली. मोठ्या प्रमाणात रक्तस्राव झाल्याने त्याची प्रकृती अत्यंत गंभीर झाली. उपस्थितांनी तातडीने त्याला उपचारासाठी जगदाळे मामा हॉस्पिटलमध्ये (Jagdale Mama Hospital Solapur) दाखल केले. मात्र, डॉक्टरांनी तपासणीनंतर त्याला मृत घोषित केले.

या घटनेमुळे क्रीडा प्रशिक्षण केंद्रांमधील सुरक्षेच्या उपाययोजनांबाबत गंभीर प्रश्न उपस्थित झाले आहेत. अल्पवयीन मुलांकडून जड यंत्रसामग्री हाताळून घेतल्याचा आरोप करण्यात आला असून या प्रकरणी जबाबदारी निश्चित करण्याची मागणी होत आहे. बार्शी पोलिसांनी घटनेची नोंद घेतली असून पुढील तपास सुरू आहे.