गेल्या काही दिवसापासून एकनाथ शिंदे पक्षातील अंतर्गत बदल करू लागले आहेत. जिल्हा प्रमुख नियुक्ती नंतर काम न करणाऱ्या मंत्री आणि पाधिकाऱ्यांवर कारवाईचा बडगा उगारला. आता हाती आलेल्या माहितीनुसार शिवसेनेचे मुख्य नेते एकनाथ शिंदे यांनी सोलापूर, माढा लोकसभेची अख्खी जिल्हा कार्यकारिणीच बरखास्त करण्याचे आदेश दिलेत, त्यामुळे या दोन्ही लोकसभेतील सर्व निवडी रद्द करण्यात आल्या आहेत.यामुळे या दोन्ही मतदार संघात खळबळ उडाली आहे.

खासदार श्रीकांत शिंदे यांनी बुधवारी या दोन्ही मतदारसंघात आढावा बैठक घेतली. त्यानंतर आज तडकाफडकी निर्णय घेत जिल्हा कार्यकारिणी बरखास्त करण्यात आली आहे. जिल्हा कार्यकारणी सोबतच महिला आघाडी, युवासेना आणि इतर प्रकोष्ट रद्द करण्यात आले आहे. त्यामुळे आता सोलापूर आणि माढा लोकसभेतील जिल्हाप्रमुख ते शाखाप्रमुखापर्यंतच्या सर्व निवडी रद्द करण्यात आल्या आहेत. शिवसेना प्रमुख नेते एकनाथ शिंदे यांच्या आदेशानंतर ही कार्यकारणी बरखास्त करण्यात आली आहे.

खासदार श्रीकांत शिंदे यांच्या सोलापुरातील बैठकीत काही पदाधिकाऱ्यांनी गैरवर्तन केले होते, त्यामुळे श्रीकांत शिंदे संतापले देखील होते. त्यानंतर अखेर आज जिल्ह्यातील सर्वच कार्यकारणी बरखास्त करण्यात आली आहे. यामुळे आता आगामी काळात या दोन्ही मतदारसंघांना नवी कार्यकारिणी मिळण्याची शक्यता आहे.

यामुळे या ठिकाणी आता शिवसेनेची धुरा नवीन पदाधिकाऱ्यांच्या खांद्यावर दिली जाण्याची शक्यता आहे. याबाबत बोलताना श्रीकांत शिंदे यांनी, ‘सोलापूर, धाराशिव, माढा या लोकसभाचा आढाव आम्ही या बैठकीत घेत आहे. शिंदे साहेबांच्या आदेशाने संपर्क प्रमुख नेमण्यात आलेले आहेत. ते सर्व जबाबदारी पार पाडत आहेत. आम्ही लोकसभानिहाय आढावा घेण्यात येत आहे, यानंतर अगदी वार्डनिहाय देखील आढावा घेतला जाईल. जिल्हापरिषद, महापालिका निवडणुकीत आम्हाला चांगलं यश मिळालं असल्याचं शिंदे म्हणाले.