राज्यातील महायुती सरकारने महिलांसाठी मुख्यमंत्री माझी लाडकी योजना सुरू केली आहे. या योजनेअंतर्गत महिलांना दर महिन्याला १५०० रुपयांची मदत दिली जाणार आहे. योजनेचा अर्ज भरण्यासाठी महिला ठिकठिकाणी गर्दी करीत आहेत. अशातच सोलापूरमधून एक धक्कादायक घटना समोर आली आहे. लाडकी बहीण योजनेचा अर्ज भरताना एका अंगणवाडी सेविकेचा हृदयविकाराच्या झटक्याने मृत्यू झालाय.

सुरेखा रमेश आतकरे असे मृत महिलेचे नाव आहे. मिळालेल्या माहितीनुसार, सोलापूरच्या मोहोळ (Solapur News) तालुक्यातील देगाव येथील अंगणवाडी क्रमांक १ मध्ये लाडकी बहीण योजनेचा अर्ज भरण्याचे काम सुरू होते. यावेळी अंगणवाडी सेविका असलेल्या सुरेखा यांना अचानक हृदयविकाराचा (Heart Attack) तीव्र झटका आला.

काही क्षणातच त्या खुर्चीवर कोसळल्या. मोठा आवाज झाल्याने भांडी स्वच्छ असलेल्या त्यांच्या मदतनीस धावत समोरच्या खोलीत आल्या. त्यावेळी त्यांना सेविका सुरेख आतकरे या खुर्चीत निपचित पडल्याच दिसून आले. आरडाओरड झाल्यानंतर आसपासच्या नागरिकांनी अंगणवाडीकडे धाव घेतली.

बेशुद्ध अवस्थेत असलेल्या सुरेखा यांना तत्काळ मोहोळ मधील सरकारी दवाखान्यात दाखल करण्यात आले. मात्र डॉक्टरांनी तपासणी करून त्यांना मृत घोषित केलं. सुरेखा यांचा मृत्यू हृदयविकाराच्या झटक्याने झाला असावा, असा प्राथामिक अंदाज डॉक्टरांनी वर्तवला आहे.

शवविच्छेदनानंतर या घटनेची नोंद मोहोळ पोलिस ठाण्यात करण्यात आली आहे. सुरेखा यांच्या निधनामुळे संपूर्ण देगाव गावावरप शोककळा पसरली आहे. अत्यंत शोकाकूल वातावरणात गुरुवारी सुरेखा यांच्यावर देगाव येथील स्मशानभूमीत अंत्यसंस्कार करण्यात आले आहेत.