सोलापूर : शाळेत ये- जा करण्यासाठी विद्यार्थ्यांसाठी शाळेची बस असून शाळा सुटल्यानंतर मुलांना घरी सोडण्यासाठी जात असताना धावत्या बसमधून विद्यार्थी खाली कोसळला. यानंतर डोक्यावरून बसचे चाक गेल्याचा त्याचा जागीच मृत्यू झाल्याची घटना सोलापूरमध्ये घडली आहे. मुलाच्या मृत्यूने पालकांनी आक्रोश केला. तसेच शाळा प्रशासनाच्या चुकीमुळे मुलाचा मृत्यू झाल्याचा आरोप केला आहे.

सोलापूरमध्ये घडलेल्या या घटनेत अनुराग तीपण्णा राठोड (वय १३) असे मृत मुलाचे नाव आहे. मुलांना शाळेत ये- जा करण्यासाठी पालक वर्ग खासगी रिक्षा किंवा शालेय प्रशासनाची बस लावत असतात. अर्थात मुलांना बसमधून नेताना आणि घरी आणत असताना त्यांच्या सुरक्षितेची जबाबदारी बस चालक व सोबत असलेल्या वाहकाची असते. मात्र यात निष्काळजीपणा केल्याने मुलाचा बळी गेल्याचे बोलले जात आहे. 

धावत्या बसमधून पडला 
अनुराग राठोड हा शाळा प्रशासनाच्या बसमधूनच तो ये- जा करत होता. नेहमीप्रमाणे आज सकाळी शाळेत गेला होता. दुपारी शाळा सुटल्यानंतर शाळेतून घरी येतं असताना बसमधून तो खाली पडला. त्यानंतर बसच्या चाकाखाली सापडला. डोक्यावरून चाक गेल्याने डोक्याचा चेंदामेंदा झाल्याने अनुरागचा जागीच मृत्यू झाला होता. तर अचानक घडलेल्या या घटनेने बसमधील अन्य विद्यार्थी घाबरले होते. 

कुटुंबीयांचा आक्रोश 
दरम्यान अनुरागच्या मृत्यूची बातमी कळताच कुटुंबियांनी एकच आक्रोश केला. तर बसमध्ये विद्यार्थी असताना बसचा दरवाजा बंद करणे गरजेचे होते. मात्र गाडीतील वाहकाने काळजी घेतली नसल्याने विद्यार्थ्यांचा मृत्यू झाल्याचा आरोप अनुरागच्या कुटुंबीयांनी केला. तर याप्रकरणी बस चालक, वाहक आणि शाळा प्रशासनावर गुन्हा दाखल करण्याची मागणी शिंदे गटाने केली आहे.