पंढरपूर - राज्यातील महाविकास आघाडी सरकारच्या 17 मंत्र्यांवर कोरोना‌ (Corona) काळात करण्यात आलेला १ कोटी ४० लाख रूपयांचा आरोग्य खर्च आता वादात सापडला आहे. कोरोना काळात अनेक गरीब रूग्ण उपचारा अभावी तडफडून मरत असताना सर्व सामान्यांच्या पैशावर हे राजकीय बांडगुळं का पोसायची असा सवाल उपस्थित करत या संशयास्पद खर्चाचे सरकारने ऑडिट करावे, अशी मागणी स्वाभिमानी शेतकरी संघटनेचे अध्यक्ष राजू शेट्टी (Raju Shetty) यांनी केली आहे.

हे देखील पाहा -

शेट्टी यांनी राज्य सरकारच्या विरोधात बळीराजा हुंकार यात्रा काढली आहे. ही यात्रा रात्री माळशिरस तालुक्यातील विझोरी येथे मुक्कामी आली होती. यावेळी बोलताना राजू शेट्टी ‌यांनी महाविकास आघाडी सरकारच्या कारभारावर टिकास्त्र सोडले.

एका बाजूला कोरोना काळात उपचार करण्यासाठी पैसे नाहीत म्हणून अनेक गरीब रूग्ण तडफडून मेले तर दुसऱ्या बाजूला महाराष्ट्राच्या मंत्रिमंडळात असलेल्या मंत्र्यांवर एवढा अमाप खर्च झाला. ही बांडगुळ सर्वसामान्य लोकांनी का पोसायची? हा खरा सवाल आहे. खरोखरच एवढे पैसे खर्च व्हावेत इतका त्यांचा गंभीर आजार होता का ? याचे देखील सोशल ऑडिट झाले पाहिजे. सरकारमध्ये हिंमत असेल तर मंत्र्यांच्या आरोग्यावर करण्यात आलेल्या आरोग्य खर्चाचे सामाजिक कार्यकर्त्यांकडून हे सोशल ऑडिट करावे अशी मागणी ही शेट्टी यांनी केली आहे.

Edited By - Shivani Tichkule