सिंधुदुर्ग : सिंधुदुर्ग (sindhudurg) जिल्ह्यात चार नगरपंचायतीसाठी आज (मंगळवार) मतदान सुरु आहे. याचं दरम्यान वैभववाडीतील मतदान केंद्र क्रमांक आठवर जिवंत मतदाराला मयत ठरविल्याचा प्रकार मतदार मतदानासाठी आल्यावर समाेर आला.

वैभववाडी (vaibhavwadi) नगरपंचायत निवडणुकीत (election) निवडणूक विभागाचा अनागोंदी कारभार समोर आला. जिवंत मतदाराला मयत म्हणून शिक्का मारून सुरवातीला त्याला मतदान (voting) करण्यास अटकाव करण्यात आला. यामुळे मतदान केंद्रावर काही गाेंधळ निर्माण झाला. पालिकेच्या मुख्याधिका-यांनी कागदपत्रांची खातरजमा करून संबंधित व्यक्तीस मतदानाचा हक्क बजाविण्यास संमती दिली.

भिकाजी वाडीले हे आज वैभववाडी येथे मतदान करण्यासाठी मतदान केंद्र क्रमांक आठ येथे आले. यावेळी त्यांनी मतदार यादी पाहिल्यावर त्यांना धक्काच बसला. मतदार यादीतमधील त्यांच्या नावासमोर मयत असा शिक्का मारण्यात आला होता. यावेळी त्यांनी मतदान केंद्रावरील अधिका-यांना चूक निदर्शनास आणून दिली. या प्रकारामुळे बराच वेळ केंद्रावर गोंधळ सुरु हाेता.

अखेरीस पालिकेचे मुख्याधिकारी सूरज कांबळे यांनी तिथे येत खातरजमा करून त्यांना मतदान करण्यास परवानगी दिली. तब्बल एक तासाच्या गोंधळानंतर अखेर वाडीले यांनी मतदान केले. या प्रकारामुळे निवडणूक विभागाचा भोंगळ कारभार मात्र समोर आला आहे.

edited by : siddharth latkar