शिंदे सेनेचे नेते आणि मंत्री संजय शिरसाट यांचा मुलगा सिद्धांत यांच्यावर एका महिलेने शरीरसंबंध, लग्न अन् गर्भपात असे गंभीर आरोप केले आहेत. सिद्धांत शिरसाट यांनी धमकावलं, बळजबरीने शारीरिक संबंध ठेवल्याचे गंभीर आरोप त्या महिलेने केले आहे. तसेच मानसिक आणि शारीरिक छळ केल्याचा आरोपही त्या महिलेनं केला. या प्रकरणी महिलेने पोलिसांत तक्रार दाखल केली आहे. पोलिसांकडून दोन्ही बाजूने तपास सुरू आहे. या आरोपामुळे मंत्री संजय शिरसाट यांच्यावर विरोधकांकडून टीकेची झोड उडण्याची शक्यता आहे.

महिलेने तक्रारीत काय म्हटले ?

२०१८ मध्ये सोशल मीडियावरून सिद्धांत शिरसाट यांच्यासोबत ओळख झाली. त्यानंतर दोघांचे संबंध अधिक घट्ट झाले. त्यांच्यामधील बोलणं आणि भेटीगाठी वाढल्या. दोघेही चेंबूरमधील एका फ्लॅटवर भेटायचे. त्या फ्लॅटवर सिद्धांत आणि महिलेमध्ये शारीरिक संबंध झाल्याचे तक्रारीत महिलेने म्हटलंय. शरीरसंबंधानंतर महिला गरोदर राहिली. मात्र, दबाव टाकत सिद्धांतने गर्भपात करायला लावल्याचंही महिलेनं आपल्या तक्रारीत म्हटलं.

त्या महिलेने ॲड. चंद्रकांत ठोंबरे यांच्या मार्फत सिद्धांत शिरसाट यांच्याविरोधात कायदेशीर नोटीस बजावली आहे. सिद्धांतने फसवणूक केल्याचा आरोप त्या महिलेने आपल्या तक्रारीत केला आहे. तिने दावा केला आहे की सिद्धांत यांनी तिला आत्महत्येची धमकी देऊन भावनिक ब्लॅकमेल करत लग्नासाठी दबाव टाकला. 'माझ्याशी लग्न कर नाहीतर मी आत्महत्या करेन' अशा प्रकारचं ब्लॅकमेलिंग केलं होतं. त्यामुळे तिनं नवऱ्यासोबत घटस्फोट घेतला आणि सिद्धांतच्या भावनिक आश्वासनावर विश्वास ठेवून लग्न केले, असा आरोपही महिलेकडून करण्यात आला आहे.

१४ जानेवारी २०२२ रोजी सिद्धांत शिरसाटने आपल्यासोबत बौद्ध पद्धतीनं लग्न केल्याचे महिलेने म्हटले आहे. याबाबतचे पुरवा असल्याचा दावाही तिने केला आहे. लग्नानंतर, सिद्धांत यांच्या वागणुकीत बदल झाला आणि छत्रपती संभाजीनगर येथे घेऊन जाण्यास नकार दिला, असं महिलेनं सांगितलं. महिलेच्या आरोपाबाबत आम्ही मंत्री संजय शिरसाट यांच्यासोबत संपर्क साधण्याचे प्रयत्न करत आहोत, अद्याप संपर्क होऊ शकलेला नाही.

महिलेच्या वकिलांनी सांगितले की, २० डिसेंबर २०२४ रोजी शाहूनगर पोलिस स्टेशनमध्ये तक्रार दाखल करण्यात आली होती, परंतु संजय शिरसाट हे मंत्री असल्यामुळे पोलिसांनी कारवाई केली नाही. त्यामुळे, त्यांनी सात दिवसांच्या आत सिद्धांत शिरसाट यांनी तिला नांदविण्यासाठी घरी घेऊन यावे आणि न्याय द्यावा, अन्यथा महिला अत्याचार प्रतिबंधक कायदा, हुंडा प्रतिबंधक कायदा आणि फसवणूक यांसारख्या विविध कलमांनुसार कायदेशीर कारवाई केली जाईल.