गडचिरोलीच्या आरमोरी तालुक्यातील कोजबी येथे हृदयद्रावक घटना घडली आहे. चौथीच्या वर्गात शिकणाऱ्या एका मुलाने गळफास घेत आत्महत्या केली आहे. या घटनानेने परिसरात हळहळ व्यक्त केली जात असून मुलाच्या जाण्याने कुटुंबियांवर दुःखाचा डोंगर कोसळला आहे. पोलीस या घटनेचा सविस्तर तपास करत आहेत. मृत मुलाचे नाव संस्कार विनोद कन्नाके आहे.

मिळालेल्या माहितीनुसार, संस्कारचे आई-वडील पोटाची खळगी भरण्यासाठी शेजारील तेलंगणा राज्यात मिरची तोडण्याकरिता गेलेले आहेत. घरी कोणीही नसल्याने संस्कार एकटाच घरी होता. रविवारी सायंकाळी ४.३० च्या सुमारास १० वर्षीय संस्कारने राहत्या घरी गळफास घेऊन आपली जीवनयात्रा संपविली.

शाळेतून घरी परतल्यानंतर तो शांत शांत होता. तो कोणत्यातरी विचारात होता. मात्र कोणत्या हे अद्यापही समोर आलेले नाही. शाळेतून घरी आल्यानंतरच संस्काराने हे टोकाचे पाऊल उचलले असल्याचे म्हटले जात आहे. एका शांत, निरागस बालकाचा देह गळफास घेतलेल्या अवस्थेत पाहून संस्कारांच्या आईने हंबरडा फोडला. या घटनेची माहिती आरमोरी पोलिसांना देण्यात आली. माहिती मिळताच पोलीस पथकाने घटनास्थळी दाखल.

पोटच्या मुलाला लटकलेल्या अवस्थेत पाहून संस्कारांच्या आईच्या पायाखालची जमीन सरकली. शिवाय गावकऱ्यांनी देखील हळहळ व्यक्त केली आहे. मात्र या मुलाने आत्महत्येला का कवटाळलं याचं कारण समोर आलेलं नाही. पोलीस या घटनेचा तपास करत आहेत.