भाजप आमदार गोपीचंद पडळकर यांनी सांगलीतील जत विधासभा मतदारसंघात जयंत पाटील यांच्यावर जहरी टीका केली होती. यामुळे राज्यातील राजकीय वातावरण ढवळून निघालं. शरद पवारांनी याबाबत देवेंद्र फडणवीसांना फोन करून नाराजी व्यक्त केली. फडणवीसांनी यानंतर पडळकरांना फोन करून सल्ला दिला होता. पडळकरांनी राजाराम बापू यांच्याबद्दलही वादग्रस्त वक्तव्य केलं होतं. पडळकरांच्या वादग्रस्त विधानांनंतर बापू बिरू वाटेगावकर यांचा मुलगा शिवाजी वाटेगावकर यांनी थेट त्यांना इशारा देत दम भरला आहे.

शिवाजी वाटेगावकर यांनी पडळकरांच्या विधानांचा समाचार घेतला आहे. 'जयंत पाटलांविरूद्ध तू काहीही बोलतोस. तो व्यक्ती तुला काय आलतू फालतू वाटला काय? तू कधीतरी वाळवा तालुक्यात यायचा विचार कर, तुझे कपडे काढूनच तुला परत पाठवतो. तू जत तालुक्यातून निवडून येऊन दाखव. तुला समाजात काडीहीची किंमत नाही', असं वाटेगावकर म्हणाले.

'धनकर समाजाला त्यानं मान खाली घालायला लावलीय. बापूंसारख्या व्यक्तींवर तू बोलतोस, एवढा मोठा झाला का तू?' असा हल्लाबोल त्यांनी केला. 'वाळवा तालुक्यात तू येऊन दाखव. कपडेच काय तुझी चड्डी सुद्धा ठेवणार नाही', असं म्हणत शिवाजी वाटेगावकर यांनी पडळकरांवर थेट हल्लाबोल केला.

देवेंद्र फडणवीसांनी फोन केल्यानंतर पडळकरांनी प्रतिक्रिया दिली होती. 'मुख्यमंत्री देवेंद्र फडणवीस यांचा मला फोन आला होता. अशी वक्तव्य करू नका, अशा पद्धतीची सूचना त्यांनी मला दिलीय. मी त्यांच्या सूचनेचं पालन करतो. देवेंद्र फडणवीस यांनी मला ज्या काही सूचना दिल्या आहेत. त्याचं मी पाळण करेन', असं गोपीचंद पडळकर म्हणाले.