शिवसेनेला स्थापन होऊन आज 60 वर्षे पूर्ण झाली असून एकनाथ शिंदे यांच्या सेनेचा मेळावा गोरेगाव येथील नेस्को सेंटरमध्ये पार पडत आहे. तर ठाकरेसेनेचा सायन येथील षण्मुखानंद सभागृहात पार पडत आहे. यावेळी उद्धव ठाकरे यांनी शिवसैनिकांना उद्देशून जोशपूर्ण भाषण करत कार्यकर्त्यांचा उत्साह वाढवला. भाषणाच्या सुरुवातीलाच उद्धव ठाकरे यांनी, “जमलेल्या माझ्या हिऱ्यापेक्षा मौल्यवान शिवसैनिकांनो… अशा शब्दांत कार्यकर्त्यांना साद घालत भावनिक संवाद साधला. कोणी माय का लाल हे देणं माझ्यापासून हिरावून घेऊ शकत नाही, असे ठामपणे सांगत त्यांनी शिवसैनिकांच्या निष्ठेवर विश्वास व्यक्त केला.

यावेळी त्यांनी विरोधकांवरही निशाणा साधला. खासदारांच्या फुटीनंतर शिवसैनिक खचला नाही, उलट पेटलेला आहे. ऑपरेशन तुडवाला आदेश द्या असं सांगितलं जातं, पण बाळासाहेबांनी आदेश आधीच दिले आहेत, असे म्हणत त्यांनी त्या 6 खासदारांना इशारा दिला. तसेच ठाकरे यांनी पक्षातील ताकद अधोरेखित करत चार खासदारांचा सत्कार झाला असून आपल्याकडे वीस आमदार आणि अनेक नगरसेवक आहेत, असे सांगितले. तसेच, संकटामागून संकटं आली तरी शिवसैनिक त्यावर मात करणार, असा विश्वास व्यक्त केला.

काँग्रेसमध्ये विलीन होण्याच्या विरोधकांच्या टीकेला उत्तर देताना त्यांनी स्पष्ट शब्दांत सांगितले, भाजपसोबत राहूनही आम्ही भाजपत विलीन झालो नाही, तर काँग्रेसमध्ये कसे होणार? निवडणूक निकालांवरून पक्षाच्या यश-अपयशाचे मोजमाप करण्यावरही त्यांनी भाष्य केले. यश-अपयश केवळ निकालांशी जोडायला लागलो, तिथे आपण चुकतो, असे मत त्यांनी व्यक्त केले.