उसाच्या थकबाकीची मागणी करण्यासाठी घरी आलेल्या शेतकऱ्याला शिवसेनेच्या पदाधिकाऱ्याने मारहाण केली आहे. ही धक्कादायक घटना छत्रपती संभाजीनगर जिल्ह्यातील पैठणमधून उघडकीस आली आहे. या प्रकरणी शेतकऱ्याने थेट पोलीस ठाणे गाठत शिवसेनेच्या पदाधिकाऱ्याविरोधात तक्रार दाखल केली आहे. या घटनेनंतर पोलिसांनी चार जणांविरोधात गुन्हा दाखल केला आहे. सध्या या मारहाणीचा व्हिडिओ सोशल मीडियात व्हायरल होत आहे.

राहूल कांबळे असे शेतकऱ्याचे नाव आहे. तर, सचिन घायाळ असे आरोपी शिवसेनेच्या उपनेत्याचे नाव आहे. सचिन घायाळ उद्धव ठाकरेंच्या शिवसेनेचा पदाधिकारी असल्याची माहिती आहे. राहुल कांबळे यांनी दिलेल्या माहितीनुसार, उसाच्या थकबाकीची मागणी करण्यासाठी घायाळ याने शेतकऱ्याला घरी बोलावून घेतलं.

घराच्या ठिकाणी बोलावून घेतल्यानंतर राहूल यांना शिवीगाळ करत मारहाण केली. एक घटनेचा एक व्हिडिओही शूट करण्यात आला होता. मारहाण करतानाचा व्हिडिओ सोशल मीडियात व्हायरल केला. राहुल कांबळे यांनी श्री संत एकनाथ सचिन घायाळ शुगर लिमिटेड कारखान्याला मागील गळीत हंगामात ऊस दिला होता. काही पेमेंट मिळाल्यानंतर उर्वरित पेमेंट देण्यासाठी चार महिन्यांपासून टाळाटाळ केली जात होती. अशी माहिती शेतकऱ्याने दिली.

त्यानंतर, कांबळे यांना घायाळ यांनी रविवारी सकाळी घरी बोलावले. 'तुला पेमेंट देत नाही, काय करायचं ते कर..' असं म्हणत घायाळ याने शेतकऱ्यावर हल्ला चढवला. घायाळ यांच्यासह अमोल घायाळ, सुनील घायाळ, रवींद्र थोटे या चौघांनी मिळून काठीसह लाथाबुक्क्यांनी राहूल यांच्यावर प्राणघातक हल्ला केला.

या घटनेनंतर त्यांनी तातडीने पोलीस ठाण्यात धाव घेतली. तसेच आरोपींविरोधात तक्रार दाखल केली. पोलिसांनी चारही आरोपींविरोधात गुन्हा दाखल केला आहे. सध्या पोलिसांकडून पुढील तपास सुरू आहे.