सचिन बनसोडे 

शिर्डी (अहिल्यानगर) : शिर्डीत आज गुरुपौर्णिमेचा मोठा उत्साह दिसून येत आहे. सकाळपासूनच साईभक्तांनी उत्सवानिमित्त दर्शनासाठी मोठी गर्दी केली आहे. आलेले भाविक साईचरणी मोठ्या प्रमाणात दान करत असून आजच्या गुरुपौर्णिमेनिमित्ताने साईबाबांच्या चरणी ६५ लाख रुपयांचे सोने आणि चांदीने दान करण्यात आले आहे. अजून देखील दान करणाऱ्यांचा ओघ सुरूच आहे. 

शिर्डीच्या साई मंदिरात साजरा केल्या जाणाऱ्या तीन दिवसीय गुरुपौर्णिमा उत्सवाचा आज मुख्य दिवस आहे. यामुळे आज सकाळपासून साई समाधीसह गुरुस्थान मंदिराच्या दर्शनासाठी भाविकांनी मोठी गर्दी केली आहे. साईबाबांना गुरुस्थानी मानून दरवर्षी लाखो साई भक्त शिर्डीत दर्शनासाठी येत असतात. आज देखील सकाळपासूनच भाविकांचा मोठा उत्साह दिसून येत आहे. आज साई मंदिर रात्रभर दर्शनासाठी खुले राहणार आहे.  

५९ लाख रुपयांचा सोन्याचा मुकुट अर्पण 
गुरुपौर्णिला दानशूर भाविकांकडून साईबाबांच्या चरणी गुरुदक्षिणा म्हणून मोठ्या प्रमाणात दान करण्यात येत असते. त्यानुसार सकाळपासून भाविकांकडून मौल्यवान वस्तूंचे दान करणे सुरु आहे. त्यानुसार साई चरणी आतापर्यंत ६५ लाख रुपयांचे सोने चांदीचे दान आले आहे. यात ५९ लाख रुपये किमतीचा सोन्याचा मुकुट, ३ लाख रुपये किमतीचे सोन्याचे फुल आणि २ लाख ८० हजार रुपये किमतीचा चांदीचा हार अर्पण करण्यात आला आहे. 

चार किमी पर्यंत दर्शन रांग 

शिर्डीमध्ये गुरूपोर्णिमेनिमित्त भाविकांची अलोट गर्दी पाहण्यास मिळत आहे. यामुळे साई मंदिराचे दर्शन कॉम्प्लेक्स हाऊसफुल झाले असून नगर- मनमाड महामार्गावर तिन ते चार किलोमीटरपर्यंत भाविकांच्या रांगा लागलेल्या आहे. यामुळे दर्शनासाठी साधारण चार ते पाच तासांचा कालावधी लागत आहे. तरी देखील साईनामाचा जयघोषात भाविक साईचरणी नतमस्तक होत आहेत. गर्दी वाढल्याने संस्थान सुरक्षा रक्षकांची मोठी दमछाक होत असल्याचे पाहण्यास मिळत आहे.