Gopichand Padalkar Jayant Patil Sharad Pawar : भाजप आमदार गोपीचंद पडळकर यांनी राष्ट्रवादी काँग्रेस शरद पवार गटाचे जेष्ठ नेते जयंत पाटील यांच्यावर खालच्या पातळीवर जाऊन टीका केली होती. पडळकरांनी जयंत पाटील यांचा एकेरी उल्लेख केला होता. या वादग्रस्त वक्तव्यामुळे शरद पवार यांनी नाराजी व्यक्त केली आहे. त्यांनी मुख्यमंत्री देवेंद्र फडणवीस यांना फोन करुन 'बेताल वक्तव्य करणाऱ्या नेत्यांना आवरा' असे म्हटले आहे.

सांगलीत अभियंता आत्महत्या प्रकरणावरुन काढण्यात आलेल्या मोर्चामध्ये गोपीचंद पडळकर सामील झाले होते. तेव्हा त्यांनी जयंत पाटील यांच्या वडिलांचा उल्लेख करत खालच्या पातळीवरील विधान केले होते. या प्रकरणामुळे शरद पवारांनी मुख्यमंत्री फडणवीस यांना फोन करुन सुनावले आहे. त्यांनी मुख्यमंत्र्यांना 'अशी गलिच्छ टीका करणे योग्य नाही' असे म्हटल्याची माहिती समोर आली आहे.

शरद पवार यांनी मुख्यमंत्री देवेंद्र फडणवीस यांच्याशी या प्रकरणावर संवाद साधला. 'बेताल वक्तव्य करणाऱ्या नेत्यांना आवरा', असे शरद पवार म्हणाले. शरद पवार यांच्याआधी अजित पवारांनीही पडळकर यांचे कान टोचले होते. भाजपच्या लोकप्रतिनिधींचे किंवा त्यांच्या नेत्यांचे चुकत असेल, तर त्याची नोंद भाजपने घ्यायला हवी. वादग्रस्त वक्तव्यावरुन महायुतीचे धोरण ठरलेले आहे. देवेंद्र फडणवीस यांच्याकडे भाजप संदर्भातील जबाबदारी असल्याचे ते यावर निर्णय घेतली, असे अजित पवार यांनी म्हटले होते.

सांगलीच्या जतमधील अभियंता प्रकरणावरून गोपीचंद पडळकर विरोध जयंत पाटील असा संघर्ष निर्माण झाला आहे. गोपीचंद पडळकरांकडून जयंत पाटील यांच्यावर करण्यात आलेल्या जहरी टिकेच्या निषेधार्थ इस्लामपूरमध्ये राष्ट्रवादी आणि जयंत पाटील समर्थकांकडून मोर्चा काढून ठिय्या आंदोलन करण्यात आले आहे. या मोर्चासाठी जयंत पाटील यांच्याच्या इस्लामपूर मतदारसंघातून शेकडो कार्यकर्ते जतसाठी रवाना होणार आहेत. इस्लामपूर शहरातील छत्रपती शिवाजी महाराजांच्या पुतळ्यासमोर एकत्रित येत गोपीचंद पडळकर यांच्या विरोधात जोरदार घोषणाबाजी आणि फलक झळकवत संताप व्यक्त करण्यात आला आहे.