सोलापूर : राज्याचे उपमुख्यमंत्री एकनाथ शिंदे हे शेतकऱ्यांचे नेते आहेत. तेच राज्यातील शेतकऱ्यांची कर्जमाफी करू शकतात, असा मोठा दावा राष्ट्रवादी काँग्रेस शरदचंद्र पवार गटाचे माळशिरसचे आमदार उत्तम जानकर यांनी केला आहे. त्यांच्या या दाव्याने पवार गटात राजकीय राजकीय खळबळ उडाली आहे.

शरद पवार यांच्या पक्षाचे मोहोळचे आमदार राजू खरे, माढ्याचे आमदार अभिजीत पाटील हे सातत्याने मुख्यमंत्री देवेंद्र फडणवीस उपमुख्यमंत्री एकनाथ शिंदे यांच्या संपर्कात असतात. त्यातच आता माळशिरसचे आमदार उत्तम जानकर यांनीही उपमुख्यमंत्री एकनाथ शिंदे यांची भेट घेऊन त्यांचे कौतुक केले आहे. एवढेच नाही तर एकनाथ शिंदे हे शेतकऱ्यांचे नेते असल्याचा त्यांनी उल्लेख केला आहे.

एकनाथ शिंदे हे जमिनीवर असलेले आणि निरपेक्षपणे काम करणारे नेते आहेत. त्यांनी यांच्या काळात अनेक चांगली कामे झाली. शेतकऱ्यांच्या कर्जमाफीबाबतही उपमुख्यमंत्री शिंदे हेच निर्णय घेऊ शकतात. त्यामुळे मी शिंदे यांची भेट घेतल्याचा खुलासा माळशिरसचे शरद पवार गटाचे आमदार उत्तम जानकर यांनी केलाय.

एकनाथ शिंदे यांची आळंदी येथे भेट झाली. त्यानंतर पंढरपूरमध्ये भेट झाली. दोन्ही वेळेला पवित्र ठिकाणी भेट झाली आहे. शिंदे हे नेहमीच त्यांनी घेतलेले निर्णय पूर्ण करतात आणि यामुळेच शेतकरी कर्जमाफीचा न्याय शिंदेच देऊ शकतील असा दावा जानकर यांनी केला.

मुख्यमंत्री उपमुख्यमंत्री जेव्हा येत असतात, तेव्हा मतदारसंघातील आरोग्याची किंवा इतर अडचणीची कामे करून घेण्यासाठी त्यांची भेट घ्यावी लागते आणि म्हणूनच मी उपमुख्यमंत्री एकनाथ शिंदे यांना भेटल्याचे जानकर यांनी सांगितले.

जानकर यांच्या जात प्रमाणपत्रामुळे त्यांची आमदारकी अडचणीत आल्यानेच त्यांनी शिंदेंची भेट घेतल्याच्या चर्चेबाबत त्यांना छेडले असता जरी माझे जात प्रमाणपत्र रद्द झाले तरी ती अडचण मला 2029 च्या निवडणुकीत येईल. एकदा विधानसभेला कागदपत्राची छाननी झाल्यानंतर माजी आमदारकी पाच वर्षे कोणी रद्द करू शकत नाही, असा टोला जानकर यांनी विरोधकांना लगावला. जरी माझं जात प्रमाणपत्र रद्द झालं, तरी लोक पुन्हा मला माझं जात प्रमाणपत्र आणून देतील. त्यानंतर निवडणुकीत उभे करतील, असा टोलाही सत्ताधाऱ्यांना आमदार जानकर यांनी लगावला.