योगेश काशिद, साम प्रतिनिधी

कुठे आहेस रे तू? तुझ्या..., अशा अर्वाच्य भाषेत शरद पवार गटाचे बीडमधील आमदार संदीप क्षीरसागर यांनी एका लेखापालला शिवीगाळ केलीय. संदीप क्षीरसागर यांचा शिवीगाळ करण्याचा नवा कारनामा समोर आल्याने खळबळ माजलीय. संदीप क्षीरसागर हे शरद पवार गटाचे आमदार आहेत. आमदार क्षीरसागर यांनी बीड नगरपालिकेचे लेखापाल गणेश पगारे यांना कार्यकर्त्याच्या फोनवरून शिवीगाळ केलीय. याप्रकरणी लेखापाल यांनी पोलीस अधीक्षकांकडे तक्रार केली आहे.

गणेश पगारे, असं लेखापालाचे नाव आहे. गणेश पगारे हे सकाळी घरी असताना चौरे नावाचा कार्यकर्ता त्यांच्याकडे आला. त्यावेळी चौरे यांनी आमदार संदीप क्षीरसागर यांना फोन लावून दिला. त्यावेळी आमदार क्षीरसागर यांनी कामाच्या संदर्भात विचारणा करत गणेश पगारे यांना शिवीगाळ केली, अशी तक्रार पगारे यांनी दिलीय. या प्रकरणात पोलीस अधीक्षकांकडे लेखी अर्ज करण्यात आला आहे. आता या प्रकरणात गुन्हा दाखल करण्यात यावा अशी मागणी गणेश पगारे केली आहे.

आमदारांनी आईवरून दिली शिवी

गणेश पगारे यांनी पोलीस अधीक्षकांकडे आमदार क्षीरसागर यांच्याविरोधात तक्रार दिलीय. पगारे यांनी दिलेल्या तक्रारीनुसार, काल आमदार क्षीरसागर यांचा त्यांना फोन आला, त्यावेळी त्यांनी ते कुठे आहेत, याची विचारणा केली. त्यानंतर पगारे यांना आमदारांनी भेटायला बोलवलं. त्याप्रमाणे पगारे त्यांना भेटायला पवार अपार्टमेंट येथे गेले. त्यावेळी आमदार यांचा पीए चौरे यांनी पगारे यांना बाहेर बसायला लावले.

बराच वेळ झाला तरी आमदारांनी पगारे यांना भेटायला बोलवलं नाही. मग काही वेळाने आमदार क्षीरसागर हे ऑफिसच्या बाहेर निघून गेले. तेव्हा चौरे यांना पगारे यांनी आमदार यांच्याविषयी विचारणा केली आणि घरी निघून गेले. त्यानंतर आज सकाळी पगारे आपल्या घरी असताना आमदार यांचे पीए चौरे आमदाराचा निरोप घेऊन आले. त्यांनी आमदाराचा फोन आल्याचं त्याचा फोन पगारे यांना दिला. त्यावेळी आमदार क्षीरसागर यांनी लेखापाल यांना शिवीगाळ केली.