Barsu Refinery Protest: कोकणातल्या बारसू रिफायनरी प्रकल्पाच्या (Barsu Refinery Project) सर्वेक्षणाचा वाद चांगलाच पेटला आहे. या सर्वेक्षणाला विरोध करत ग्रामस्थांनी आंदोलन पुकारले आहे. या आंदोलनाचा आज दुसरा दिवस असून आंदोलक आपल्या मागण्यांवर ठाम आहेत. या आंदोलकांवर पोलिसांच्या (Ratnagiri Police) बळाचा वापर केला जात असल्याचे दिसून येत आहे.

याबाबत राज्याचे राजकारण चांगलेच तापले असून राष्ट्रवादीचे सर्वेसर्वा शरद पवार यांनी उद्योगमंत्री उदय सामंत यांनी फोन करत सर्वे थांबवण्याबद्दल चर्चा केल्याचे समोर आले आहे. (Latest Marathi News)

याबाबत अधिक माहिती अशी की, बारसू रिफायनरी प्रकल्पाबद्दल राष्ट्रवादी कॉंग्रेस अध्यक्ष शरद पवार (Sharad Pawar) यांनी उद्योगमंत्री उदय सामंत (Uday Samant) यांनी फोनवरुन चर्चा केली आहे. या चर्चेमध्ये शरद पवार यांनी "हा सर्वे थांबवा, लोकांशी आपण चर्चा करुया, एकत्र बसून विश्वासात घेऊन केलं पाहिजे नाहीतर, प्रोजेक्ट अडचणीत येईल," अशी भूमिका मांडली आहे.

तसेच शरद पवार यांनी "या आंदोलनात ज्यांना अटक केली त्यांना सोडून द्यावे, असेही सांगितले आहे. शरद पवार यांच्याशी झालेल्या चर्चेनंतर उदय सामंत यांनी याबाबत मुख्यमंत्र्यांशी बोलून त्यांना कळवतो, असे आश्वासन दिले आहे. तसेच या संदर्भात उदय सामंत आणि शरद पवार उद्या सिल्वर ओकवर भेट होणार असल्याचीही माहिती समोर आली आहे..

राजू शेट्टींनीही दिला होता इशारा..

या प्रकल्पाबद्दल बोलताना स्वाभिमानी शेतकरी संघटनेचे अध्यक्ष राजू शेट्टी यांनी "बारसू प्रकल्प लादण्याचा प्रयत्न कराल तर याद राखा, संपूर्ण महाराष्ट्रातील शेतकरी घेवून आंदोलकांसोबत उभा राहीन; स्थानिकांचा विरोध असेल तर हा प्रकल्प होऊ देणार नाही, त्यामुळे दडपशाहीचा मार्ग अवलंबाल तर हे प्रकरण महागात पडल्याशिवाय राहणार नाही," असा इशाराही शिंदे फडणवीस सरकारला दिला आहे..