उद्धव ठाकरेंनी राज ठाकरेंसोबतच्या युतीबाबत आपली भूमिका स्पष्ट केलीय... दुसरीकडे शरद पवारांनीही राज ठाकरेंना सोबत घेण्याबाबत सकारात्मक भूमिका घेतलीय...राज ठाकरेंसह व्होटचोरी विरोधातील सत्याचा मोर्चा एकत्र काढता मग निवडणूक वेगळी का लढवता? असा सवाल पवारांनी केल्याची माहिती सुत्रांनी दिलीय..तर दुसरीकडे या सल्ल्यानंतरही काँग्रेस आपल्या भूमिकेवर ठाम आहे... मात्र राज ठाकरेंना सोबत घेण्याबाबत काँग्रेस हायकमांडशी चर्चा सुरु असल्याचं ठाकरेसेनेनं म्हटलंय..

दुसरीकडे पवारांच्या राष्ट्रवादीने भाजपला रोखण्यासाठी विरोधकांची मोट बांधण्याचे संकेत दिलेत... तर मनसेनं मात्र महाविकास आघाडीत सहभागी होण्याबाबत सावध भूमिका घेतलीय... खरंतर महाविकास आघाडीने लोकसभा निवडणूक एकत्र लढवली.. त्यामुळे मुंबईतील 6 पैकी 4 तर राज्यात 30 जागांवर विजय मिळवला... मात्र त्यानंतर विधानसभेला महाविकास आघाडीत जागावाटपामध्ये जोरदार रस्सीखेच रंगली.. त्याचाच फटका बसल्यानं महाविकास आघाडीचा सुफडा साफ झाला... आता हिंदीसक्तीविरोधात आधीच ठाकरे बंधू एकत्र आलेत.. त्यांची युती जवळपास निश्चित मानली जातेय... त्यातच आता पवारही राज ठाकरेंसोबत युतीसाठी आग्रही असल्याची चर्चा आहे...मात्र पवार आग्रही असतानाही काँग्रेसला राज ठाकरे का नकोसे झालेत?

राज ठाकरेंची आक्रमक हिंदुत्ववादी आणि मराठी भूमिका

मराठीच्या मुद्द्यावरुन मारहाणीमुळे उत्तर भारतीय मतं दुरावण्याची भीती

भोंग्याविरोधातील भूमिकेमुळे अल्पसंख्याक मतं दुरावण्याची शक्यता

2019 मध्ये पवारांच्या पुढाकारानं सत्तेसाठी विरुद्ध विचारधारेचे शिवसेना, राष्ट्रवादी आणि काँग्रेस एकत्र आले होते.. या तीन्ही पक्षांनी अडीच वर्षे यशस्वी सरकार चालवून दाखवलं... त्यामुळे पवारांकडून राज ठाकरेंसाठी मध्यस्थीच्या हालचाली सुरु असल्याने काँग्रेस हायकमांड या नव्या समीकरणासाठी हिरवा झेंडा दाखवणार का? याकडे राज्याचं लक्ष लागलंय... मात्र राज ठाकरेंसह महाविकास आघाडी एकत्र निवडणूक लढल्यास भाजपसमोर तगडं आव्हान उभं राहू शकतं, हे मात्र निश्चित...