फय्याज शेख, शहापूर

भातसा नदीत अंघोळीसाठी उतरलेला मुलगा बुडत असल्याचं पाहून त्याच्या आईनंही उडी मारली. ती देखील बुडू लागल्यानं काठावर असलेल्या भाचीनंही पाण्यात उडी मारली. मात्र, बाहेर पडला न आल्यानं तिघांचाही बुडून मृत्यू झाला. शहापूर तालुक्यातील गोठेघर वाफे येथे ही दुर्दैवी घटना घडली. जीवरक्षक पथकाच्या मदतीनं मायलेकासह भाचीचा मृतदेह नदीपात्राबाहेर काढण्यात आला. या घटनेमुळं परिसरात हळहळ व्यक्त होत आहे.

कपडे धुवायला नदीवर गेले अन् विपरीत घडलं

शहापूर तालुक्यातील गोठेघर वाफे येथील भातसा नदीवर वनिता सुदर्शन शेळके (वय,३३, राहणार- वाफे), लक्ष्मी दत्तात्रय पाटील (वय ५०, रा. चेरपोली) या दोन महिला कपडे धुण्यासाठी गेल्या होत्या. त्यांच्यासोबत धीरज दत्तात्रय पाटील (वय, १५, राहणार चेरपोली) हा देखील गेला होता.

उन्हाचा तडाखा असल्याने धीरज अंघोळ करण्यासाठी पाण्यात उतरला. त्याला खोलीचा अंदाज आला नाही. तो बुडू लागला. ते बघून आईने त्याला वाचवण्यासाठी नदीपात्रात उडी मारली. पण ती सुद्धा बुडू लागली. दोघेही बुडत असल्याचे भाचीने बघितले. तिनेही पाण्यात उडी घेतली. मात्र, तिघांचाही नदीत बुडून मृत्यू झाला.

परिसरात हळहळ

आईसह मुलगा आणि भाचीचाही नदीत बुडून मृत्यू झाल्यानं कुटुंब, नातेवाईक आणि गावावर शोककळा पसरली. भातसा नदीत तिघे बुडाल्याची माहिती पोलीस आणि जीवरक्षक पथकाच्या सदस्यांना मिळताच त्यांनी तात्काळ घटनास्थळी धाव घेतली. त्यांनी नदीपात्रात शोध घेतला. काही वेळाने तिघांचे मृतदेह बाहेर काढले. मायलेकासह भाचीचा मृतदेह बघून गावातील प्रत्येकाचं मन हेलावून गेलं. या तिन्ही मृतदेह शवविच्छेदनासाठी शहापूर येथील उप जिल्हा रूग्णालयात पाठवण्यात आले आहे.