सचिन बनसोडे, अहिल्यानगर प्रतिनिधी
Ahilyanagar crime news : यात्रेतील टेंडर दुसऱ्याला दिल्याच्या कारणावरून नगरसेवकाला पिस्तुलाचा धाक दाखवून जीवे मारण्याची धमकी दिल्याचा प्रकार अहिल्यानगर जिल्ह्यातील राहाता शहरात घडला आहे. भाजपचे नगरसेवक तथा सुजय विखे यांचे निकटवर्तीय दहरथ तुपे यांना जीवे मारण्याची धमकी देण्यात आल्याने मोठी खळबळ उडाली आहे. राहाता शहराचे नगराध्यक्ष आणि सर्व नगरसेवकांनी एकत्र येत या घटनेचा निषेध केला असून तुपे यांच्या फिर्यादीवरून तुषार सदाफळ नामक व्यक्तीसह त्याच्या साथीदारांवर गुन्हा दाखल करण्यात आलाय.
राहाता नगरपरिषदेचे भाजपचे नगरसेवक दशरथ तुपे यांना तुषार सदाफळ याने फोनवरून तसेच चौकात जमाव जमवून पिस्तुलाचा धाक दाखवत जीवे मारण्याची धमकी दिल्याची धक्कादायक घटना समोर आली आहे. याप्रकरणी राहाता नगरपरिषदेचे नगराध्यक्ष आणि सर्व नगरसेवकांनी पोलीस निरीक्षकांना निवेदन देऊन संबंधित आरोपीवर कठोर कारवाई करण्याची आणि नगरसेवक तुपे यांना पोलीस संरक्षण देण्याची मागणी केलीय.
राहाता शहराचे ग्रामदैवत श्री विरभद्र यात्रेनिमित्त पाळण्याचे टेंडर आपल्याला दिले नाही याचा राग मनात धरून सदाफळ याने हे कृत्य केले आहे. शिवीगाळ करत स्वतःकडील परवानाधारक बंदुकीचा धाक दाखवून तुषार सदाफळ याने जीवे मारण्याची धमकी दिल्याचे नगरसेवक दशरथ तुपे यांनी दिलेल्या फिर्यादीत म्हंटले आहे. तुषार सदाफळ हा परवानाधारक बंदुकीच्या जोरावर नेहमीच शहरातील व्यापाऱ्यांवर दहशत निर्माण करतो.
यात्रेच्या टेंडर प्रक्रियेत माझा काहीही संबंध नसताना मला जीवे मारण्याची धमकी देण्यात आल्याने मला आणि माझ्या कुटुंबाला तुषार सदाफळ याच्यापासून धोका असल्याने त्याच्यावर कठोर कारवाई व्हावी अशी मागणी तुपे यांनी केली आहे. दरम्यान घटनेनंतर तुषार सदाफळ हा फरार झाला असून पोलिस त्याचा शोध घेत आहेत. विखे पाटलांच्या निकटवर्तीय नगरसेवकाला जीवे मारण्याची धमकी देण्यात आल्याने राहाता तालुक्यात मोठी खळबळ उडाली आहे.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.