Summary -

• सहलीसाठी निघालेल्या विद्यार्थ्यांची एसटी बस उलटली

• ओतुर येथे घडली अपघाताची घटना

• अपघातामध्ये १५ विद्यार्थी जखमी

• बसमध्ये ५३ विद्यार्थी, शिक्षक आणि पालक होते

रोहिदास गाडगे, पुणे

शाळेच्या विद्यार्थ्यांना सहलीसाठी घेऊन जाणाऱ्या एसटी बसला भीषण अपघात झाला. या अपघातामध्ये १५ विद्यार्थी जखमी झाले आहेत. आहिल्यानगर- कल्याण महामार्गावर ओतुर येथे ही घटना घडली. चालकाचा बसवरील ताबा सुटला आणि बस रस्त्याच्या कडेला उलटली. हा अपघात गुरूवारी सकाळच्या सुमारास झाला. या अपघातामुळे परिसरात खळबळ उडाली.

मिळालेल्या माहितीनुसार, आहिल्यानगर जिल्ह्यातून जिल्हा परिषद शाळेतील ५३ विद्यार्थ्यांना सहलीसाठी घेऊन निघालेल्या बसला अपघात झाला. जुन्नर तालुक्यातील शिवनेरी, ओझर, लेण्याद्री परिसरात सहल येत होती. यावेळी ओतुरजवळ चालकाचा एसटी बसवरील ताबा सुटल्याने एसटी बस डिव्हाईडरला धडकली त्यानंतर ही बस रस्त्याच्या कडेला उलटली. अहिल्यानगर- कल्याण महामार्गावरील खामुंडी गावाच्या हद्दीत ही घटना घडली.

हा अपघात इतका भीषण होता की यामध्ये १५ विद्यार्थी जखमी झाले. स्थानिक नागरिकांच्या मदतीने विद्यार्थींना उपचारासाठी रुग्णालयात दाखल करण्यात आले आहे. या बसमध्ये विद्यार्थ्यांसोबत शिक्षक आणि पालक देखील होते. या अपघातामुळे काही काळ घटनास्थळी गोंधळाचे वातावरण होते. जखमींना तातडीने रुग्णालयात हलवण्यात आले. सुदैवाने या अपघातामध्ये जीवितहानी झाली नाही. पोलिस सध्या या अपघाताचा तपास करत आहेत.