ओंकार कदम, सातारा

साताऱ्यातून धक्कादायक बातमी समोर आली आहे. साताऱ्यातील वाईमध्ये MIDC परिसरातील एका औद्योगिक कंपनीत कार्यरत असलेल्या परप्रांतीय कामगाराने आत्महत्या केली आहे. प्राथमिक अंदाजानुसार, मानसिक तणावातून ही आत्महत्या केल्याचे म्हटले जात आहे. दुर्गा रोधा प्रधान असे मृत कामगाराचे नाव असून ते मूळ झारखंडमधील राजाबासामध्ये राहत होते.

मिळालेल्या माहितीनुसार, दुर्गा प्रधान हे काही काळापासून वाईच्या एमआयडीसीतील एका कंपनीत काम करत होते. गेल्या काही दिवसांपासून त्यांची मानसिक स्थिती ठीक नसल्याचे त्यांच्या सहकाऱ्यांनी सांगितले. या मानसिक तणावातूनच त्यांनी आगीच्या भट्टीत उडी घेऊन हे टोकाचे पाऊल उचलल्याचा प्राथमिक अंदाज व्यक्त करण्यात येत आहे.

घटनेनंतर कंपनी परिसरात एकच खळबळ उडाली. या प्रकरणाशी संबंधित एक व्हिडिओ सोशल मीडियावर व्हायरल होत असल्याचे समोर आले आहे. घटनेची नोंद वाई पोलीस ठाण्यात करण्यात आली असून पोलिसांनी तपास सुरू केला आहे. मृत्यूमागील नेमके कारण, त्यांची मानसिक अवस्था तसेच इतर कोणतेही कारण या घटनेशी संबंधित आहे का, याचा शोध घेतला जात आहे.या घटनेने परिसरात खळबळ उडाली आहे.