संदिप भोसले

Latur News :

लातूरमधून एक धक्कादायक बातमी समोर आली आहे. येथील एका सरपंचांनी अंगावर पेट्रोल ओतून घेत आत्मदहनाचा प्रयत्न केला आहे. रखडलेल्या रस्त्याचे काम पूर्ण करण्यासाठी थेट सरपंचाने अंगावर पेट्रोल ओतून घेतलं आहे. या घटनेमुळे परिसरात एकच खळबळ उडाली आहे.

मिळालेल्या अधिक माहितीनुसार, लातूर-जहीराबाद महामार्गाचे काम गेल्या अनेक वर्षापासून रखडलेलं आहे. या महामार्गावर गेल्या दोन वर्षात 18 जणांचा अपघाती मृत्यू झालाय. तर महामार्गाचे काम पूर्णत्वाकडे जाण्याआधीच महामार्गाला ठिकठिकाणी भेगा देखील पडल्या आहेत.

अनेकदा महामार्गावरील पानचिंचोली, मसलगाव ,लोदगा नीटूर, या गावातील नागरिकांनी महामार्गाचे काम चांगल्या प्रतीचे आणि महामार्गावर दिशादर्शक फलक, गावाशेजारी महामार्गाला सुरक्षा जाळ्या लावण्याच्या मागणीसाठी आंदोलन केली होती. मात्र महामार्ग प्रशासन यांच्या मागणीकडे दुर्लक्ष करत आहे.

त्यामुळे संतप्त लातूरच्या लोदगा गावातील सरपंच गोमारे यांनी आज जिल्हाधिकारी कार्यालयासमोर चक्क स्वतःवर पेट्रोल ओतून घेत आत्मदहनाचा प्रयत्न केलाय. दरम्यान यावेळी पोलीस प्रशासनाने त्यांना ताब्यात घेत आत्मदहनापासून रोखल आहे. ही घटना घडल्या परिसरात एकच खळबळ उडाली आहे.

लातूर-जहीराबाद महामार्ग नागरिकांसाठी मृत्यूचा सापळा बनला आहे. वाहतुकीचे नियम पाळून देखील या महामार्गावर अनेक तरुणांचा देखील अपघाती मृत्यू झालाय. रस्त्यावर ठिकठिकाणी खड्डे आणि मोठमोठ्या भेगा आहेत. रस्याला पडलेल्या भेगा पाहता हा रस्ता कधीही खचू शकतो अशीही भीती आहे.

लातूर-नांदेड महामार्गावर मोठा अपघात

काल लातूर नांदेड महामार्गावरच्या महाळुंगरा पाटी येथे अपघाताची एक मोठी घटना घडली. कार आणि ट्रॅक्टरच्या ट्रॉलीचा भीषण अपघात झाला. नांदेडवरून तुळजापूर येथे दर्शनासाठी जात असेलेल्या गाडीने उसाने भरलेल्या ट्रॉलीला पाठीमागून धडक दिली. भीषण अपघात चार जणांचा जागीच मृत्यू झाला, तर कारमधील इतर दोन जण गंभीर जखमी झाले आहेत.