मस्साजोगचे सरपंच संतोष देशमुख हत्या प्रकरणातील आरोपी कृष्णा आंधळे फरार आहे. गेल्या ९८ दिवसांपासून पोलीस त्याच्या मागावर आहेत. कृष्णा बऱ्याचदा नाशिकमध्ये दिसल्याचा दावा स्थानिक नागरिकांनी केला होता. पण तो अद्याप पोलिसांच्या तावडीत सापडलेला नाही. कृष्णा आंधळे सापडणे अतिशय गरजेचं आहे. कारण त्याच्याकडे महत्त्वाचे पुरावे आहेत, असा दावा दिवंगत संतोष देशमुख यांचे बंधू धनंजय देशमुख यांनी केला आहे.

संतोष देशमुख हत्या प्रकरणाला ९८ दिवस उलटले. या प्रकरणात ९ आरोपी असून, ८ जणांना अटक करण्यात आली आहे. मात्र, कृष्णा आंधळे अजूनही फरार आहे. कृष्णा आंधळे तपास यंत्रणेला सापडणं अतिशय गरजेचं आहे. कारण त्याच्याकडे महत्त्वाचे पुरावे असू शकतात, अशी शक्यता धनंजय देशमुखांनी वर्तवली आहे.

धनंजय देशमुख नेमकं काय म्हणाले?

'कृष्णा आंधळेकडे जास्त पुरावे असावेत. त्यामुळे तो पोलीस यंत्रणेच्या ताब्यात येण्यासाठी एवढी दिरंगाई करतो आहे. त्याच्याकडे नक्कीच ठोस पुरावे असतील. त्यामुळे कृष्णाला ताब्यात घेत त्याची चौकशी करणं गरजेचं आहे'. तसेच या प्रकरणातील आरोपींना फाशीची शिक्षा झाली पाहिजे, अशी मागणीही धनंजय देशमुख यांनी केली आहे.

मस्साजोगचे दिवंगत सरपंच संतोष देशमुख यांच्या हत्या प्रकरणाला ३ महिने उलटले. या प्रकरणात सीआयडीनं दोषारोपपत्र दाखल केले. यातून अनेक बाबी उघडकीस आल्या. या प्रकरणाची आणखी चौकशी सुरू आहे. तसेच फरार आरोपी कृष्णा आंधळेचा शोधही पोलीस घेत आहेत.