भरत मोहळकर, साम टीव्ही, प्रतिनिधी

राज्यभर गाजत असलेल्या सरपंच हत्या प्रकरणात नवा ट्विस्ट आलाय.. सरपंच संतोष देशमुखांची हत्या अनैतिक संबंधातून झाल्याचं भासवण्यासाठी पोलिसांनी डाव आखला होता, असा गंभीर आरोप मस्साजोगच्या ग्रामस्थांनी खासदार सुप्रिया सुळेंच्या समोरच केलाय. तर त्यासाठी एक महिला तयार ठेवण्यात आल्याचाही आरोप करण्यात आलाय.

संतोष देशमुखांना हत्येनंतर पोलिसांनी त्यांना अॅम्ब्युलन्समध्ये टाकून कळंबच्या दिशेने नेण्याचा प्रयत्न केला. मात्र गावकऱ्यांनी पाठलाग केल्याने हा डाव फसल्याचं पुढं आलंय. त्यावर धनंजय देशमुखांनी प्रतिक्रीया दिलीय. तर संतोष देशमुखांना सगळ्या बाजूने संपवण्याचा डाव मारेकऱ्यांनी रचल्याचा दावा धनंजय देशमुखांनी केलाय.. तर गाडी कळंबला पोहचण्याआधीच संतोष देशमुखांचा मृत्यू झाल्याने पोलिसांचा डाव फसल्याचा दावा सुरेश धसांनी केलाय.

सरपंच संतोष देशमुखांना अनैतिक संबंधात अडकवून त्यांच्या हत्येचं समर्थन घडवण्याचा कट रचणाऱ्या पोलिसांची चौकशी करुन त्यांच्यावर मकोकांतर्गत कारवाई कधी केली जाणार? याकडे लक्ष लागलंय.