बीडच्या मस्साजोग येथील सरपंच संतोष देशमुख यांच्या हत्या प्रकरणावरून नागरिक आक्रमक झाले आहेत. या हत्या प्रकरणानंतर संतप्त झालेल्या नागरिकांनी शनिवारी महामूक मोर्चाचे आयोजन केले आहे. उद्या बीडमध्ये निघणाऱ्या मोर्चाच्या पार्श्वभूमीवर मोठी वाहतूक कोंडी होण्याची शक्यता आहे. त्यामुळे बीडमधील वाहतूक मार्गात अनेक बदल करण्यात आले आहेत. सकाळी आठ ते संध्याकाळी सहा वाजेपर्यंत वाहतूक मार्गात हे बदल राहणार आहेत. त्यामुळे नागरिकानी पर्यायी मार्गाचा वापर करण्याचं आवाहन केले जात आहे.

संतोष देशमुख हत्या प्रकरणी विविध मागण्यांसाठी शनिवारी महामूक मोर्चाचे आयोजन करण्यात आले आहे. या मोर्चाच्या पार्श्वभूमीवर वाहतूक कोंडी होऊन नागरिकांची गैरसोय होऊ नये यासाठी बीड शहरामध्ये येणाऱ्या वाहतूक मार्गात बदल करण्यात आले आहेत. त्यामुळे ही वाहतूक पर्यायी मार्गाने वळविण्याचे आदेश पोलिस अधीक्षक नवनीत कॉवत यांनी काढले आहेत. वाहतुकीमध्ये नेमके काय बदल करण्यात आले आहेत ते आपण पाहणार आहोत....

- शहरातील नगर नाका, छत्रपती शिवाजी महाराज चौक, बस स्थानक, रिलायन्स पेट्रोल पंप, महालक्ष्मी चौक या मार्गावरील वाहतूक उद्या नगर नाका-राजीव गांधी चौक-अंबिका चौक-रिलायन्स पेट्रोल पंप-महालक्ष्मी चौक या पर्यायी मार्गाने वळविण्यात येणार आहे.

- छत्रपती संभाजी महाराज चौक - बार्शी नाका - छत्रपती शिवाजी महाराज चौक-बस स्थानक-महालक्ष्मी चौक या मार्गे जाणारी वाहने, छत्रपती संभाजी महाराज चौक-बीड बायपास-महालक्ष्मी चौक या पर्यायी मार्गाने वळविण्यात येणार आहे.

- छत्रपती संभाजी महाराज चौक-बार्शी नाका-छत्रपती शिवाजी महाराज चौक-नगर नाका या मार्गावरील वाहतूक छत्रपती संभाजी महाराज चौक- बीड बायपास- महालक्ष्मी चौक-रिलायन्स पेट्रोल पंप-अंबिका चौक-राजीव गांधी चौक-नगर नाका या पर्यायी मार्गाने वळविण्यात येणार आहे.

- परळी- बार्शी नाका-छत्रपती शिवाजी महाराज चौक- नगर नाका- महालक्ष्मी चौक या मार्गावरील सर्व वाहतूक परळी-बार्शी नाका-बीड बायपास-महालक्ष्मी चौक-रिलायन्स पेट्रोल पंप-अंबिका चौक-राजीव गांधी चौक-नगर नाका या मार्गे वळविण्यात येणार आहे.

दरम्यान, वरील मार्गावरील सर्व वाहतूक ही मोर्चासाठी जाणारी वाहने, बंदोबस्तातील वाहने, रुग्णवाहिका, अग्निशामक दलाची वाहने वगळून २८ डिसेंबर रोजी सकाळी आठ ते संध्याकाळी सहा वाजेपर्यंत सर्व प्रकारची वाहतूक वरील मार्गाने वळविण्यात येणार आहे. त्यामुळं सर्व वाहन चालक-मालक यांनी याची नोंद घ्यावी असे आवाहन पोलीस अधीक्षक नवनीत कावत यांनी केले आहे.