ऐन दिवाळीत कोठारेंच्या या विधानाने धुमधडाका उडालाय. मोदीप्रेमाने झपाटलेल्या कोठारेंना सोशल मीडियावर चांगलंच ट्रोल केलं जातंय. कांदिवलीतील एका दिवाळी पहाटच्या कार्यक्रमात ज्येष्ठ अभिनेते-दिग्दर्शक महेश कोठारेंनी हे राजकीय विधान केलंय. मात्र त्याचे तीव्र पडसाद उमटलेत. कोठारे नेमकं काय म्हणाले ते ऐका.

धुमधडाका, थरथराट, झपाटलेला या चित्रपटांमधून घराघरात पोहचलेल्या या ज्येष्ठ अभिनेत्याने थेट मुंबईत भाजपचं कमळ फुलणार, असा विश्वास व्यक्त केल्याने विरोधकांनी त्यांचा समाचार घेतला. तात्या विंचू तुम्हाला येऊन चावेल, असा टोला संजय राऊतांनी लगावलाय. तर तात्या विंचू व्हिलन होता..तो तुमच्या सोबत आहे, असं प्रत्युत्तर भाजपने दिलंय.

कांदिवलीतील कार्यक्रमाला भाजपचे माजी खासदार गोपाल शेट्टी, मुंबई प्रदेश भाजपचे उपाध्यक्ष प्रकाश दरेकर याच्यासह प्रमुख नेत्यांनी उपस्थित होती. मुंबई महापालिकेच्या तिजोरीची चावी आपल्याच हाती हवी यासाठी सत्ताधाऱ्यांचा खटाटोप सुरु आहे. 2017 मध्ये बीएमसी निवडणुकीत शिवसेनेला 84 तर भाजपला 82 जागा मिळाल्या होत्या. त्यामुळे भाजपला सत्तेची स्वप्ने पडणे साहजिक आहे. कलाकारांची साथ मिळत असेल तर भाजपला ती हवीच आहे. आता खरंच मायानगरीत कमळ फुलणार की ठाकरे बंधूंचा ब्रॅण्ड चालणार याकडे सगळ्यांचं लक्ष आहे.