शिवसेना उबाठा गटाचे खासदार संजय राऊत यांनी भाजपवर जळजळीत टीकास्त्र केलं आहे. आज झालेल्या पत्रकार परिषदेत मत चोरी, घोटाळे यातूनच महायुतीचा विजय झाल्याचा घणाघात केला. तर शिवसेना आणि मनसे हे दोन्ही पक्ष कार्यकर्त्यांना बळ देत असल्याचे सूचक वक्तव्य करायला ते विसरले नाहीत. तसेच राष्ट्रवादी काँग्रेसचे अध्यक्ष शरद पवार यांनी बारामती येथील एका कार्यक्रमात महत्त्वपूर्ण विधान केलं. या विधानाची पाठराखण करत संजय राऊत यांनी भाजपाला फटकारलं.

मिळालेल्या माहितीनुसार, काल बारामती येथे पार पडलेल्या एका कार्यक्रमात राष्ट्रवादी काँग्रेसचे अध्यक्ष शरद पवार म्हणाले, देशावर संकट आले असता, मोठे मोठे नेते इतर कोणाचे नाव न घेता, केवळ त्यांचेच नाव मदतीसाठी घेतात. कोणतीही अडचण किंवा संकट आले तरी त्याची सोडवणूक करण्यात येईल, अशी ग्वाही त्यांनी दिली. छोटी मोठी कामे असोत किंवा मोठी संकटे, त्याबाबत काळजी करू नये, असे आवाहनही त्यांनी उपस्थितांना केले. भविष्यात कोणतीही समस्या निर्माण होऊ देणार नाही आणि तिची सोडवणूक केली जाईल, असा विश्वास शरद पवार यांनी व्यक्त केला.

शरद पवार यांच्या वक्तव्यांनंतर आज झालेल्या पत्रकार परिषदेत माध्यमांशी बोलताना संजय राऊत यांनी शरद पवारांची पाठराखण करत 'ऐसा कोई सगा नही, जिसे भाजपने ठगा नही' असा टोल लगावला. संजय राऊत म्हणाले," राजकारणात तुम्ही एकमेकांवर कितीही टीका केली तरी संकटकाळात सह्याद्रीच हिमालयाच्या मदतीला धावून जातो. ज्याअर्थी शरद पवारांनी सांगितले आहे, त्याअर्थी गेल्या काही वर्षात ज्या काही घटना घडल्या त्याचा सारांश त्यांनी सांगितला आहे. नरेंद्र मोदी आणि अमित शाह यांना बाळासाहेब ठाकरे आणि शरद पवार यांनी मोठी मदत केली आहे. पण त्या मदतीचे कसे पांग त्यांनी फेडले हे आपण पाहिले आहे. "

संजय राऊत पुढे म्हणाले, "शरद पवारांचा देशाचे कृषीमंत्री म्हणून असलेला अनुभव आणि संरक्षण मंत्री म्हणून केलेले काम आजही आंतरराष्ट्रीय स्तरावर त्यांचा अभ्यास आणि संबंध याचा उपयोग शेवटी केंद्रातील लोकांना करून घ्यावा लागतो. पण राजकारणात चिखलफेक करणाऱ्या व्यक्तींना याचा विसर पडतो. "