सांगली, ता. २८ सप्टेंबर

Rohit Patil Vs Sanjay Kaka Patil: राष्ट्रवादी शरद पवार गटाच्या माजी उपनगराध्यक्षांना मारहाण केल्याप्रकरणी सांगलीत राजकारण तापले आहे. याप्रकरणी आमदार सुमनताई पाटील आणि रोहित पाटील यांनी आक्रमक भूमिका घेतल्यानंतर भाजपचे माजी खासदार संजय काका पाटील यांच्यासह ५ जणांवर गुन्हा दाखल करण्यात आला आहे. यावरुनच संजय काका पाटील यांनी रोहित पाटील यांच्यावर जोरदार टीका केली होती. संजय काका पाटील यांच्या या टीकेचा रोहित पाटलांनीही समाचार घेतला आहे.

काय म्हणाले रोहित पाटील?

'विधानसभेपर्यंत काय करायचे ते करून घ्या, विधानसभेनंतर तुम्हाला काही करायला देणार नाही, असा इशारा राष्ट्रवादी शरद पवार गटाचे युवा नेते रोहित आर आर पाटील यांनी भाजपाचे माजी खासदार संजयकाका पाटील यांना दिला आहे. त्याचबरोबर यापुढे कार्यकर्त्यांच्या घराकडे बघाल तर गाठ माझ्याशी आहे, असा सज्जड इशारा देखील रोहित पाटलांनी दिला आहे. सांगलीच्या कवठेमहांकाळमध्ये आयोजित निषेध सभेमध्ये ते बोलत होते.

कवठे महांकाळचे राष्ट्रवादी काँग्रेस शरद पवार गटाचे माजी उपनगराध्यक्ष अय्याज मुल्ला यांना भाजपाचे माजी खासदार संजयकाका पाटलांच्या कार्यकर्त्यांकडून मारहाण केल्याचा प्रकार घडला होता. या प्रकरणी कवठेमहांकाळ मध्ये राष्ट्रवादी काँग्रेस शरद पवार गटाच्याकडून निषेध मोर्चाचे आयोजन करण्यात आले होते. मात्र पोलिसांनी परवानगी नाकारल्याने सभा घेऊन निषेध नोंदवण्यात आला.

सांगलीचे खासदार विशाल पाटील, राष्ट्रवादी शरद पवार गटाच्या आमदार सुमनताई यांच्यासह तासगाव-कवठेमहांकाळ मधील राष्ट्रवादीचे पदाधिकारी व कार्यकर्ते मोठ्या संख्येने उपस्थित होते. यावेळी बोलताना रोहित पाटील यांनी संजय काका पाटील यांच्यावर जोरदार निशाणा साधला. दरम्यान, या मारहाण प्रकरणात रोहित पाटील यांनी घाणेरडे राजकारण केल्याचा आरोप संजय पाटील यांनी केला आहे.