विजय पाटील, सांगली प्रतिनिधी

Vikram Sawant, Sangli District Bank Election : सांगली जिल्हा मध्यवर्ती बँकेच्या निवडणुकीचा प्रचार अंतिम टप्प्यात आला असताना जिल्ह्यातील राजकीय वातावरण चांगलेच तापले आहे. भाजप आमदार गोपीचंद पडळकर यांच्या जत सोसायटी गटातील एका मतदाराचे अपहरण झाल्याचा खळबळजनक प्रकार समोर आला असून, यावरून थेट काँग्रेसच्या माजी आमदारावरच पोलिसांत गुन्हा दाखल करण्यात आला आहे.

काय आहे प्रकरण?

जत सोसायटी गटातील एका मतदाराला पळवून नेल्याचा आरोप करत उमदी पोलीस ठाण्यात तक्रार नोंदवण्यात आली. या तक्रारीवरून काँग्रेसचे माजी आमदार विक्रम सावंत, पडळकर यांच्याविरोधात निवडणूक लढवणारे उमेदवार विनोद पवार आणि बाजार समितीचे माजी सभापती सुजय शिंदे यांच्याविरुद्ध अपहरणाचा गुन्हा दाखल करण्यात आला आहे. ऐन मतदानाच्या तोंडावर हा गुन्हा दाखल झाल्याने जत तालुक्यात मोठा राजकीय खळबळ उडाली आहे.

पराभव दिसू लागल्याने खोटे गुन्हे; विक्रम सावंतांचा पलटवार

दरम्यान, आपल्यावर गुन्हा दाखल झाल्यानंतर काँग्रेसचे माजी आमदार विक्रम सावंत यांनी गोपीचंद पडळकर यांच्यावर जोरदार हल्लाबोल केला आहे. सावंत म्हणाले, "जिल्हा बँक निवडणुकीत स्वतःचा पराभव स्पष्ट दिसू लागल्यामुळे गोपीचंद पडळकर यांच्या पायाखालची वाळू घसरली आहे. कोणत्याही मतदाराचे कसलेही अपहरण झालेले नाही. केवळ सत्तेचा आणि पोलिसांचा गैरवापर करून आमच्यावर हे खोटे गुन्हे दाखल करण्यात आले आहेत."

जिल्हा बँकेच्या ५ जागांसाठी धुरळा

सांगली जिल्हा मध्यवर्ती बँकेच्या एकूण २१ जागांपैकी १६ जागांवर बिनविरोध निवड झाली आहे. उर्वरित ५ जागांसाठी सध्या तीव्र चढाओढ सुरू आहे. या ५ पैकी जत सोसायटी गटातील निवडणूक भाजपचे आमदार गोपीचंद पडळकर आणि काँग्रेसचे माजी आमदार विक्रम सावंत यांच्या प्रतिष्ठेची बनल्याने संपूर्ण जिल्ह्याचे लक्ष या लढतीकडे लागले आहे.